| I | |
| Amors me fait (con)ma(n)cier une chanco(n) nouele q(ue)le me uiaut ansaignier a amer la plus bele. qui soit el mont uiuant. cest la bele au cors iant.cest cele dont ie chant die(us) man doint tel nouele qui soit a mon talant q(ue) me- nu (et) souant mes cuers por li sautele |
Amors me fait conmancier une chancon novele, qu’ele me viaut ansaignier a amer la plus bele qui soit el mont vivant: c’est la bele au cors jant, cest cele dont je chant. Dieus m’an doint tel novele qui soit a mon talant! Que menu et sovant mes cuers por li sautele. |
| II | |
| Bien me porroit auancier ma douce dame bele. sele mi uoloit aidier a ceste chancon nouele. je naim nule riens tant (con)me li seulem(en)t (et) son afaitem(en)t qui mon cuer renouele amors me lie (et) prant. (et) fait lie (et) ioiant porce qua soi mapele |
Bien me porroit avancier ma douce dame bele, s’ele mi voloit aidier a ceste chancon novele. Je n’aim nule riens tant conme li seulement et son afaitement, qui mon cuer renovele. Amors me lie et prant et fait lié et joiant, por ce qu’a soi m’apele. |
| III | |
| Quant fine amor mi se mont m(u)lt me plaist (et) agree. que cest la riens en cest mont qui plus magree. or la mestuet seruir ne man puis plus tenir (et) del tout o beir plus q(ue) riens qui soit nee. sele mi fait languir (et) uois iuqua morir marme en sera sauuuee. |
Quant fine amor mi semont, mult me plaist et agree, que c’est la riens en cest mont qui plus m’agree. Or la m’estuet servir - ne m’an puis plus tenir – et del tout obeïr plus que riens qui soit nee. S’ele mi fait languir et vois juqu’a morir, m’arme en sera sauuvee. |
| IV | |
| S e la mieu dre de cest mont ne ma samor donee tuit li a(n)moureus diront ci a fort des tinee. sa ce puis ia uenir q(ue) ie sanz repentir aie tout mon plaisir de li q(ui) tant magree. Lors sai ie sanz mentir q(ue) iaurai tout mon desir (et) ma q(ue)ste ache uee |
Se la mieudre de cest mont ne m’a s’amor donee, tuit li anmoureus diront ci a fort destinee. S’a ce puis ja venir que je sanz repentir, aie tout mon plaisir de li, qui tant m’agree, lors sai je, sanz mentir, que j’avrai tout mon desir et ma queste achevee. |
| V | |
| Cele por cui sopir la bele couloree puet bien dire (et) gehir q(ue) por li sui mar tir cest amor m(u)lt hastee. |
Cele por cui sopir, la bele couloree, puet bien dire et gehir que por li sui martir, c’est amor mult hastee. |