| I. Nus hons ne puet ami reconforter se cele non ou il a son cuer mis. por ce m'estuet souvent plaindre et plorer, que nus conforz ne me vient, ce m'est vis, de la ou j'ai toute ma remenbrance. por bien amer ai sovente esmaiance a dire voir. dame, merci! donez moi esperance de joie avoir! |
| II. Je ne puis pas souvent a li parler ne remirer les biaus euz de son vis. ce poise moi que je n'i puis aler, car adès est mes cuers la ententis. Hé, bele riens, douce sanz conoissance car me metez en meilleur atendance de bon espoir! Dame, merci! donez moi esperance de joie avoir! |
| III. Je ne sai tant vers li merci crïer qu'ele ne cuit que je soie faintis, que tante gent se sont pris au guiler qu'a paine ert mès coneüz fins amis. Ice m'ocit, ice me desavance, ice me tout ma joie et ma fiance et fet doloir. Dame, merci! donez moi esperance de joie avoir! |
| IV. Aucuns i a qui me seulent blasmer, quant je ne di a qui je sui amis, mès ja, dame, ne savra mon penser nus qui soit nez, fors vous, cui je le dis coardement, pooros, en dotance. vos poïstes lors bien a ma senblance mon cuer savoir. Dame, merci! donez moi esperance de joie avoir! |
| V. Amors, de vos me vueil du tout clamer, car en vous est trestouz li larrecins. trop savez bien le cuer d'un honme enbler, mès du rendre n'est il termes ne fins, ainz le tenez esmaiant en balance. Amors, en vous ai fet ma remenbrance de mon voloir. Dame, merci! donez moi esperance de joie avoir! |
| VI. Chanson, va t'en a Nantueil sans faillance! Phelipe di que, s'il ne fust de France, trop puet valoir. Dame, merci! donez moi esperance de joie avoir! |