| I | |
| Bernartz deuentedorn A ra non uei luzir soleill. Ta(n)t mi son escurzit lirai. E ies per aisso nomesmai. Cuna clardatz mi soleil ia. Damor qinz elcor mi raia. Eqand autra gens sesmaia. Eu meillur enans que sordei. P(er) que mos chans nots sordeia. |
Bernartz de Ventedorn Ara non vei luzir soleill, tant mi son escurzit li rai; e ges per aisso no.m esmai, c’una clardatz mi soleilia d’amor, q’inz el cor mi raia; e, qand autra gens s’esmaia, eu meillur enans que sordei, per que mos chans nots sordeia. |
| II | |
|
P rat mi semblon uert euermeill. Aissi cum el doutz temps demai. sim ten fin amors coinde egai. neus mes flors blanca euermeilla. Et iuerns calenda maia. Qeil gensser ela plus gaia. Ma promes q(ue) samor mautreia sanqer nolam desautreia. |
Prat mi semblon vert e vermeill aissi cum el doutz temps de mai; si.m ten fin amors coinde e gai: neus m’es flors blanca e vermeilla et iverns calenda maia, qe il gensser e la plus gaia m’a promes que s’amor m’autreia s’anqer no la.m desautreia. |
| III | |
|
P aor mifant maluatz cosseill. Per qel segles mor edechai. Caras sacoston li sauai. Elus ab lautre cosseilla. Cossi finamors deschaia. A maluaza gens sauaia. Qui uos ni uostre cosseill crei. Dompnidieu p(er)da edescreia. |
Paor mi fant malvatz cosseill, per qe.l segles mor e dechai: c’aras s’acoston li savai e l’us ab l’autre cosseilla cossi fin amors dechaia. A! malvaza gens savaia, qui vos, ni vostre cosseill, crei Dompnidieu perda e descreia. |
| IV | |
|
D aqestz mirancur em coreill. Car mi fan ira (et) esglai. Epesa lor del ioi qieu ai. Epois chascus sen coreilla. Delautrui ioi ni sesmaia. Ja ieu meillor dreich non aia. Cab sol deport uenz egerrei. Cel qui plus fort mi gerreia. |
D’aqestz mi rancur e.m coreill car mi fan ira et esglai e pesa lor del ioi q’ieu ai. E pois chascus s’en coreilla de l’autrui ioi ni s’esmaia, ja ieu meillor dreich no.n aia c’ab sol deport venz e gerrei cel qui plus fort mi gerreia. |
| V | |
|
N uoich eiorn plor cossir eueill. Pens esospir epuois mapai. On mieills me sta (et) ieu pieitz trai. Mas us bos respi eitz mesueilla. Don mos cossiriers sa paia. Fols p(er)que dic que mal traia. Car aitan ricamor enuei. Pronai de sola lenueia. |
Nuoich e iorn plor, cossir e veill, pens e sospir e puois m’apai. On mieills m’esta et ieu pieitz trai; mas us bos respieitz m’esveilla, don mos cossiriers s’apaia. Fols! Per que dic que mal traia? Car aitan ric amor envei pro n’ai de sola l’enveia. |
| VI | |
| I a ma dompna nois meraueill. Sil qier qem don samor nim bai. Contra la foudat qieu retrai. Farai genta me raueilla. Sil ia ma colla nim baia. Er ia doncs com mi retraia. A cal uos ui ecal uos uei. P(er) benananssa qem ueia. |
Ia ma dompna noi.s meraveill si.l qier qe.m don s’amor ni.m bai. Contra la foudat q’ieu retrai, fara i genta meraveilla, s’il ia m’acolla ni.m baia. Er ia doncs c’om me retraia “a! cal vos vi e cal vos vei!” per benananssa qe.m veia? |
| VII | |
|
B ernartz clama sidonz mercei. Uascui tant gen si merceia. E si eu enbreu no la uei. Non crei q(ue) longas laueia. |
Bernartz clama sidonz mercei, vas cui tant gen si merceia. E si eu en breu no la vei, non crei que longas la veia. |