Revisione di Edizione diplomatico-interpretativa del Mer, 22/05/2019 - 18:08

Non puosc mudar un chantar non esparga
​puois Oc-e-Non a mes foc e trat sanc,
car granz guerra fai d’escars seignor larc
per qe·m plai ben dels reis auzir la bonba,
qe n’aion obs paisson, cordas e pom
e sion trap tendut per fors jazer,
e·nz encontrem a meillers et a sens
tant q’apres nos en chant’om puois de gesta.

Qu'ieu n’agra colp recebeut en ma targa
e faich vermeill de mon confanon blanc;
mais per aisso me·n soffrisc e me·n parc
que Oc-e-Non vei que un dat mi plomba
mais eu non ai ges Lezignan ni Rancom,
qu'eu puosca loing ostejar ses aver
mas aiudar puosc de mos conoissens,
l’escut au col el chapel en ma testa.

Si·l reis Phelips n’agues ars una barga
denan Giorz o crebat un estanc,
<o a roem entres per forsa el parc>
que l’atsegues pel pueg e per la comba
c’om non pogues traire breu ses colom,
adonc sai eu q'el volgra far parer
Carle que fon dels miellz de sos parens,
per cui fon Poill'e Sansoinna conquesta.

Anta l’adus e de prez lo descarga,
Guerra celui cui om en troba franc,
per qeu non cug lais Caors ni Cairac
mos Oc-e-Non puois tant sab de trastomba
si·l reis li da lo tesor de Chimom,
de guerr'a cor et avra puois poder,
tant ll·es trebaills e messios plasens
que los amics e·ls enemics tempesta.