I.
Dona, si m’auzes rancurar
de vos ploran mi clamera,
mas no vos deg encolpar
qu’ieu sai be que tan valetz
que tot qan faitz e dizetz
m’es bon, si tot a me tira.
Mas Dieu, que no faill en re,
pregua lo hom de son be,
II.
e donx ben dei ieu vos preguar:
ja no·us en devetz far fera,
pos re no vos aus blasmar;
mas parlar be·m sufriretz —
Oc, tan qu’ieu en soi meils letz, —
c’aillor ma lengua no·s vira;
mas en vos clamar merce
non ten pro ni no·m sove.
III.
Si saubes tan Dieu predicar
ben sai c’ap se m’alberguera.
C’ades, cant ieu cug orar,
dei pregar a Dieu, creisetz,
que fos ab vos lai on etz
que d’als mos cors non consira
si que non-poders lo te
qu’ar lai non cor ab l’ale.
IV.
Pos tan vos platz eschausar
no sai si·m dirai “Trop era,
dona, que·m denhetz baizar.”
E donx com sufrir podetz
que·us bais? Pos tan mi valetz
quar ab aquel be morira
adoncs marves! (Per ma fe,
si penses so, car m’en ve.)
V.
Bela doussa dona (si·us par
qu’ieu no vailla tant enquera
que·m dejatz ab vos colgar)
neis del be que fag m’avetz
no fo anc re si temetz
c’aiatz faillit; qu’ieu faillira
e tanh meils que·ill mortz m’en me
que ja vos faillatz per me.
VI.
Domna, si me voletz pagar,
ab aitan que plus no·us quera
com eu n’ai, podetz o far
qu’eu non ai (be o sabetz)
sens vos honor ni nuill pretz
per que mos cors no s’adira
com que·m menetz, ni·s cove
pus res vas vos no·m mante.
VII.
Per que·us deu ben esser plus car,
mas mos cors ves vos s’esmera
si que res no i pot camjar:
qu’ieu sai tal, si m’en crezetz,
que val for vos d’autras detz,
qu’eu, si·m volgues, m’en jauzira;
mas si·m tenetz ferm el fre
c’autra no·m platz que·m n’estre.
VIII.
Dona, Dieu saubr’ ieu ensenhar
so don totz molt meillurera
que tolgues c’om en amar
no pogues far tort ni vetz
si nuill mal parlar no . . . etz
que no·i fail qui fortz sospira
ni trop au ni sent ni ve,
ni conois ni sap ni cre.
IX.
Dona, onguan cai’ en mal ira
sel qu’encontra vos ni me
ditz re ni conois ni cre.