| I | |
| Lo rossignols sesbaudeia. Iosta la flor el uergan. et es men pres tals enueia. que non puosc mudar non chan. mas non sai de que ni de cui. car eu non am mi ni autrui. efatz efortz car sai faire. bos uers pois no sui amaire. |
Lo rossignols s’esbaudeia Iosta la flor el vergan, et es m’en pres tals enveia que non puosc mudar, non chan; mas non sai de que ni de cui, car eu non am mi ni autrui, e fatz efortz, car sai faire bos vers, pois no sui amaire. |
| II | |
| Mais a damor qui dompneia. ab or guoill (et) ab engan. q(ue) cel que tot iorn merceia. nisauai trop humilian. capenas uol amors cellui. ques fra(n)cs e fis si cum eu siu. caissom tol tot mo(n) afaire. car no fui fals ni trichaire. |
Mais a d’Amor qui dompneia ab orguoill et ab engan que cel que tot iorn merceia ni’s avai trop humilian; c’a penas vol Amors cellui qu’es francs e fis, si cum eu sui. C’aissom tol tot mon afaire car no fui fals ni trichaire: |
| III | |
| Aissi cum lo rams si pleia. laiolue(n)s io uai menan. fatz eu uas lieis quem gerreia. p(er) far totz iorn son coman. a sos ops me gar de emestui. que si non em amic amdui. dautramor nomes ueiaire. que ia mais mos cors sesclaire. |
Aissi cum lo rams si pleia lai o’l vens lo vai menan, fatz eu vas lieis que’m gerreia, per far totz iorn son coman. A sos ops me gar de e’m estui que si non em amic amdui, d’autr’Amor no m’es veiaire, que ia mais mos cors s’esclaire. |
| IV | |
| Souen me repta emplaideia. em uai ochaisos leuan. eqand ill en ren felneia uas mi uersa tot lo dan. gen ioga demi e desdui. que deus lo sieu tort me conclui. mas ben es uer tatz que laire. cuia, tuich siont siei fraire. |
Soven me repta e’m plaideia e’m vai ochaisos levan; e qand ill en ren felneia, vas mi versa tot lo dan. Gen ioga de mi e desdui, que d’eus lo sieu tort me conclui. Mas ben es vertatz que laire cuia, tuich siont siei fraire! |
| V | |
| Hom nolaue que non creia. sos bels huoills eson semblan. e non cre quil auer deia. fellon cor ni mal talan. mas laiga que soau se sdaui. es peier q(ue) cella que brui. engan fai qui debon aire. se(m) bla enon o es gaire. |
Hom no la ve que non creia sos bels huoills e son semblan, e non cre qui’l aver deia fellon cor ni mal talan; mas l’aiga que soau se s’adui, es peier que cella que brui. Engan fai qui de bon aire sembla e non o es gaire. |
| VI | |
| Detot luoc on ill esteia. mi destuoill em uau loignan. ep(er)so que nola ueia. pas li mos huoills claus denan. cel sec a mor que nois nesdui. ecel lencaussa qui la fui. Ben ai encor delestraire. tro q(ue) uasmidonz repaire. |
De tot luoc on ill esteia, mi destuoill e’m vau loignan, e per so que no la veia pas li mos huoills claus denan. Cel sec Amor que nois n’esdui e cel l’encaussa qu’ila fui. Ben ai en cor del estraire tro que vas midonz repaire. |
| VII | |
| Ia non er sitot me greia. q(u)enqer fin eplaich noll man. q(ue) mal mes caissim recreia. ni p(er)da tant lonc affan. al sieu ops me gart emestui. e si non em am ic amdui. dautramor nomes ueiaire. q(ue) ia mos fis cors sesclaire. |
Ia non er, si tot me greia, qu’enqer fin e plaich no’ll man; que mal m’es c’aissi’m recreia ni perda tant lonc affan. Al sieu ops me gart e’m estui, e si non em amic amdui, d’autr’Amor no m’es veiaire que ia mos fis cors s’esclaire. |
| VIII | |
| Enaissi fos pres cum eu sui. mos al uergnatz eforam dui. q(ue) plus nois pogues estraire. den beluezer debelcaire. |
Enaissi fos pres cum eu sui mos Alvergnatz, e foram dui, que plus nois pogues estraire d’en Bel Vezer de Belcaire. |
| IX | |
| Tristan si nous es ueiaire. mais uos am que no suoill faire. |
Tristan, si no’us es veiaire, mais vos am que no suoill faire. |
| Bernartz deuentedorn. |
Bernartz de Ventedorn. |