I.
“Car vey fenir a tot dia
lo joi, lo rir’ e·l deport,
e no·m socor la clerzia,
non puesc mudar no·m cofort
co fay, can conois sa mort,
lo signes, que bray e cria
e·n volv son sonet per fort,
que·l cove fenir sa via
e plus no·i a de conort.”
II.
— “Maistre, si Dieus me valha,
ben dizetz so que cove;
mas ja d’aisso no vos calha
car li clerc no vos fan be;
car lo bos temps ve, so cre,
qe auretz aital guazalha
qe vos dara palafre
o renda que mais vos valha,
car lo coms de Peitieus ve.”
III.
— “Guilhalmi, non pretz mealha
so qe·m dizes, per ma fe;
mais volria una calla
estreg tener en mon se
no faria un polhe,
q’estes en autrui sarralha,
c’atendes la lor merce:
car soven, so cug, badalha
qi s’aten a l’autrui be.”
IV.
— “Maistre, gran benanansa
podetz aver si sofretz.”
— “Guilhalmi, vostra vanansa
non crei si com vo·m dizetz.”
— “Maistre, car no·m crezetz?
Grans bes vos venra de Fransa,
si atendre lo voletz.”
— “Guilhalmi, tal esperansa
vos don Dieus, com vos m’ufretz.”
V.
— “Maistre, n’ajatz coratge
d’efan ni d’ome leugier.”
— “Guilhalmi, sobre bon guatge
vos creyria volontier.”
— “Maistre, man bon destrier
an li home de paratge,
per sufertar, al derrier.”
— “Guilhalmi, fort . . . atge
e salvat e . . . . . . . . . . . ier.”
VI.
— “Maistre, josca la brosta
vos pareis al test novel.”
— “Guilhalmi, ben pauc vos costa
lo mieus ostals del castel.”
— “Maistre, conte novel
aurem nos a Pantacosta,
qe·us pagara ben e bel.”
— “Guilhalmi, fols es qi·us sosta:
vo·m pagatz d’autrui borcel.”