I.
Moult m'anue d'iver ke tant ait dureit,
ke je ne voi roisignor en bruel ramei,
et, dès ke je voi lou tens renoveleit,
se me covient ke je soie en cest esteit
plux mignos et envoixiés ke n'aie esteit.
II.
Bone dame belle et blonde l'ait loweit,
c'est bien drois ke jeu en faice sa volenteit,
ke j'avoie tout lou cuer desespereit:
per son doulz comandement l'ay recovreit;
or ait mis en moult grant joie mon penseir.
III.
Jai de joie faire ne serai eschis,
pues ke ma dame le veult, a simple vis,
et g'i ai si por s'amor mon penseir mis
ke ne poroie troveir, se m'est avis,
dame de si grant valor ne de teil prix.
IV.
Medixant ont tout lou mont en mal poent mis,
ke li siecles n'est maix cortois ne jolis,
et nonporcant ki seroit loiauls amis,
k'il ne fust fols ne vilains ne mal apris,
cil poroit avoir grant joie a son devis.
V.
Sa biaulteis et sui vair eul et ces doulz ris
me tiennent mignot et gai: plux seus jolis
ke je n'avoie ains esteit, se vos plevis.
c'est por la millor ki soit jusc'a Paris.