I
Pus vezem de novelh florir
pratz o vergiers reverdezir,
rius e fontanas esclarzir,
auras e vens,
ben deu quascus lo joy jauzir
don es jauzens.
II
D'amor non dey dire mas be.
Quar no n'ai ni petit ni re?
Quar ben leu plus no m'en cove;
pero leumens
dona gran joy qui be·n mante
los aizimens.
III
A totz jorns m'es pres enaissi
qu'anc d'aquo qu'amiey non jauzi,
ni o faray ni anc no fi,
qu'az esciens
fas mantas res que·l cor me di:
"Tot es niens."
IV
Per tal n'ai meyns de bon saber
quar vuelh so que no puesc aver,
e si·l reproviers me ditz ver
certanamens:
"A bon coratge bon poder,
qui's ben suffrens."
V
Ja no sera nuils hom ben fis
Contr'amor si non l'es aclis,
et als estranhs et als vezis
non es consens,
et a totz sels d'aicels aizis
obediens.
VI
Obediensa deu portar
a motas gens, qui vol amar,
e coven li que sapcha far
faigz avinens,
e que·s gart en cort de parlar
vilanamens.
VII
Del vers vos dig que mais en vau
qui ben l'enten ni plus l'esgau,
que·l mot son fag tug per egau
cominalmens,
e·l sonetz, qu'ieu mezeis me·n lau,
bos e valens.
VIII
A Narbona, mas ieu no·i vau,
sia·l prezens
mos vers, e vuelh que d'aquest lau·
m sia guirens.
IX
Mon Esteve, mas ieu no·i vau,
sia·l prezens
mos vers e vuelh que d'aquest lau
sia guirens.