| I | |
| [F]arai un vers pos mi sonelh en vauc et m'estauc al solelh; donnas i a de mal conselh et sai cals: cellas c'amor de cavalier tornon a mals. |
|
| II | |
| [.]dnna fai pechat mortal que non ama cavalier leal; mas si es monges o clersgau non a raizo; per dreg la deuria hom cremar ab un tezo. |
|
| III | |
| En Alvergnhe, part Lemozi, m'en ane un iorn a tapi, et trobei la moiller Guari et d'En Bernard; saluderon mi sinplamentz per sant Launart. |
|
| IV | |
| La una·m diz en son latin: "O Dieus vos salh, don pelerin." Mout mi senblatz di belh aizin, mon escient, mas trop vezem anar pe·l mond di folla gent. |
|
| V | |
| [A]r aziret cal respondutz: anc no li diz ni baf ni buf, ni fer ni fust no a mentagutz mas sol aitan: "Bariol Barial barian." |
|
| VI | |
| [S]o diz N'Agnes a N'Aimercen: "Trobat avem qe anam qeren! Sor, per amor Deu, l'alberguen, qe ben es mutz, e ia per lui nostre conseilh non er sabutz." |
|
| VII | |
| La una·m pres sotz son mantelh et mes m'en la cambra el fornel; sapchatz q'a mi fo ben et bel: el foc fo bos et eu calfei me volentiers als gros carbos. |
|
| VIII | |
| [A] maniar mi deron capos et sapchatz agui mais de dos, et no i ac cog ni cogastros mas sol nos tres, e·l pans fo blancs e·l vin fo bos e·l pebr'espes. |
|
| IX | |
| "Sor, si aqest hom es ginhos ni laicha a parler per nos; nos aportem nostr gat ros de mantenent, ql fara parlar az estros, si de re·nz ment." |
|
| X | |
| [N]'Agnes anet per l'enoios et fo granz et a gloncz guinhos; et eu, can lo vi entre nos, aig·n espavent q'a pauc non perdei l'amor et l'ardiment. |
|
| XI | |
| [Q]ant aguem begut et maniat, e·m despoillei per lor grat; detras m'aporteron lo chat mal et felon; la una·l tira del costat tro al tallon. |
|
| XII | |
| [P]er la coa mantenen tiro·l quat, el escoisen; plaias mi feron mais de cen aqella vetz, mas eu no m'ongra ges enconvers qi m'ausizes. |
|
| XIII | |
| Pos diz N'Agnes a N'Aimersen: "Mutz es qe ben es conoissen. Sor del bainh non apareillem e del soiorn." .xli. iorn estei az aqel torn. |
|
| XIV | |
| [T]ant la fotei com auziretz: .c. e iiii vinz et viii vetz q'a pauc no·i romped mos coredenz et mon arnes; et no·us pues dir lo malavegz tan gran m'en pres. |
|
| XV | |
| Ges no·us sai dir los malaveigs tan grans m'en pres. |