|
I
1 Ab ioi et ab ioven m' apais
2 e iois e iovens m' apaia,
3 que mos amics es lo plus gais
4 per qu' ieu sui coindet' e gaia;
5 e pois eu li sui veraia
6 bei ·s taing q' el me sia verais,
7 c' anc de lui amar no m' estrais
8 ni ai cor que m' en estraia.
II
9 Mout mi plai car sai que val mais
10 sel q' ieu plus desir que m' aia,
11 e cel que primiers lo m' atrais,
12 Dieu prec que gran ioi l' atraia
13 e qui que mal l' en retraia,
14 no ·l creza, fors qu' ie ·l retrais;
15 c' om cuoill maintas vetz los balais
16 ab q' el mezeis se balaia.
III
17 E dompna q' en bon pretz s' enten
18 deu ben pausar s' entendenssa
19 en un pro cavallier valen,
20 pois qu' ill conois sa valenssa,
21 que l' aus amar a presenssa;
22 que domna, pois am' a presen,
23 ja pois li pro ni ·ll avinen
24 no ·n dirant mas avinenssa.
IV
25 Q' ieu n' ai chausit un pro e gen
26 per cui pretz meillur' e genssa,
27 larc et adreig e conoissen,
28 on es sens e conoissenssa;
29 prec li que m' aia crezenssa,
30 ni hom no ·il puosca far crezen
31 q' ieu fassa vas lui faillimen,
32 sol non trob en lui faillensa.
V
33 Floris, la vostra valenssa
34 sabon li pro e li valen,
35 per q' ieu vos qier de mantenen,
36 si ·us plai, vostra mantenensa. |
|
