I.
Cil qui d'Amours me conseille
que de li doie partir
ne set pas qui me resveille
ne quel sunt mi grief souspir.
Petit a sens et voisdie
cil qui me veut chastoier,
n'onques n'ama en sa vie,
si fait trop nice folie
qui s'entremet du mestier
dont il ne se set aidier.
II.
Ha, blanche, clere et vermeille,
de vous sunt tout mi desir;
car faites en tel merveille
droiture et raison faillir.
Que je vous tieigne a amie
drois nei porroit otroier;
se vostre grant cortoisie,
plainne de bonté guarnie,
ne me deigne conseillier,
mar vous oï tant prisier.
III.
Povres cuers se desconseille
et lait de paour morir,
et viguereuz s'appareille
en biau confort de guerir.
Dame, maiz rienz que je die
ne me vaut, quar je sourquier;
s'un petit de vilenie,
esprise de felonie,
vous fait pitié desvoier,
mar vous vi et ma mort quier.
IV.
Qui trop haut bee et teseille
maint desconfort puet oïr;
maiz tres granz amours pareille
ce que li plaist a saisir:
sa tres haute seignorie
fait monter et abessier.
Douce dame, vostre aïe!
cele qui m'a en baillie
puet bien conduire et haucier
mon outrageus desirrier.
V.
Dedenz mon cuer monte treille
toute preste de flourir:
bone amours fine et feeille
qui la deigneroit joïr.
Maiz amours qui n'est joïe
ne puet cuer esleecier;
bien voi, se mort ne chastie
ma volenté, m'anemie,
ne puis mon biau tort leissier
ne mon outrage changier.
VI.
Beaus Lorenz, felon, d'envie,
me firent joie esloignier.
mainte douce conpaignie
ont a lor tort departie
a mentir et a trichier,
et riens ne s'en puet vangier.
VII.
Odins, cil cui Amors lie
est cheoiz en tel baillie
que nuns nel puet deslïer,
se Pitiez n'i vuet aidier.