Coras que·m fezes doler
Amors, ni·m dones esmai,
ara·m ten jauzen e gai,
per qu'ieu chan a mon plazer.
Qu'ieu ai plus ric joi conquis
qu'a mi no·s taignia;
e quan ricors s'umilia,
humilitatz s'enriquis.
Midons mercei e grazis
la benanansa q'ieu ai,
e ja non oblidarai
los plazers que·m fes ni·m dis;
qu'en mi non a mais poder
cil c'amar solia,
qu'en plus franca seignoria
vuoill ses engan remaner.
Derenan m'er a tener
al reprovier qu'om retrai;
“No·s mova qui ben estai”.
Non farai eu ges per ver!
Qe·l flama qu'amors noiris
m'art la nuoich e·l dia,
per qu'ieu devenc tota via
cum fai l'aurs el fuoc plus fis.
Be m'agrad' e m'abelhis
de dos amicx, quan s'eschai
que s'amon de cor verai
e l'us l'autre non trais,
e sabon luoc e lezer
gardar ses folia
que lor bona compaignia
non puosc' enojos saber.
Soven l'anera vezer,
la plus avinen q'ieu sai,
si·l devinamen qu'om fai
no m'avengues a temer.
Pero mos cors es aclis
vas lieis on qu'il sia,
que fin'amors joing e lia
tals que part loindans pais.
S'era part la crotz dels ris,
don anc hom non tornet sai,
non crezatz que·m pogues lai
retener nuills paradis.
Tant ai assis mon voler
en ma douss'amia
que senes lieis non poiria
negun autre joi aver.
Chansos, oimais potz tener
vas midons ta via,
qu'ieu sai ben qu'ella volria
te auzir e mi vezer.
Dalfi, s'auzes mon voler
dir' a ren que sia,
tant am vostra seignoria
que vos en saubratz lo ver.