| Raymbaut daurenca Amicx, ab gran cossirier suy per vos et en grai pena, e del mal q’ieu mal no mier no cre que vos sentatz guaire. Doncx, per que ·us metetz amaire pus a me laissatz tot lo mal? qar ab duy no ·l partem egual? |
|
| Dona, Amors a tal mestier pus dos amicx encadena, que ·l mal q’an e l’alegrier senta quecx a son veiaire; qu’ieu pens - e non suy guabaire – que la dura dolor coral ai eu tota a mon cabal. |
|
| Amicx, s’acsetz un cartier de la dolor que ·m malmena be viratz mon en combrier, mas no ·us cal del mieu dan guaire que - quar no m’en puesc estraire – cum que ·m an, vos es cominal, an me ben o mal atretal. |
|
| Dompna, quar yst lauzengier que m’an tout sen et alena son vostr’anguoyssos guerrier lays m’en non per talan vaire, qu’ar no ·us suy pres; qu’ab lur braire vos an bastit tal ioc mortal que no yauzem iauzen iornal. |
|
| Amicx, nuhl grat no ·us refier quar ia ·l mieus dans vos refrena de vezer me, que ·us enqier; e si vos faitz plus guardaire del mieu dan qu’ieu no vuelh faire, be ·us tenc per sobreplus leyal que no son silh de l’Espital. |
|
| Dona, ieu tem a sobrier qu’aur perdi e vos arena, que per dig de lauzengier nostr’amor tornes en caire; per so dey tener en guaire trop plus que vos, per Sanh Marsal, quar etz la res que mais me val. |
|
| Amicx tan vos sai lauzegier e fait d’amoroza mena qu’ieu cug que de cavalier siatz devengutz camjaiyre; e deg vos o ben retraire, quar ben paretz que pessetz d’al pos del mieu pensamen no ·us cal. |
|
| Dona, ia mais espavier no port ni cas ab cerena s’anc pueys que ·m donetz estier fuy de nulh autra enquistaire, ni no suy aital bauzaire; mas per enveja ·l deslial m’o alevon e ·m fan venal. |
|
| Amicx, creirai vos per aital qu’aissi ·us aya tostemps leyal. |
|
| Dona, aissi m’auretz leyal que iamais non pensarai d’al. |