| Por la meillor c'onques formast Nature chant en espoir d'avoir alegement. Onc Dieu ne fist si bele creature, ioie et valors en li croist et reprent; ce me semont de chanter liement: que tant la sai bele et vaillant et sage. Si doucement con l'aim de fin corage, soient par li alegie mi troment.
|
|
| Mes ensi est, que Raisons et Droiture dient que i'ai esploitie folement en tant que i ai trop haut mise ma cure, mes ce que Amors me comande et aprent ne porroie refuser sans outrage: qui bien la sert meuls en vaut son aage, por ce fait bon devenir de sa gent. |
|
| Por ce la serf, nus hons ne doit faindre d'Amors seruir, car tous biens vient de li: ma ioie puet enforcier ou estraindre sidoucement conques ne le senti; enbla mon cuer et ma dame ensaisi, qui bien me puet alegier ma grevance, et sil li plaist que muire entendance, si l'aim ie tant qu'il me plaist bien ausi. |
|
| Quant plus me voi guerroier et destraindre des maus d'amors qui ne m'ont pas guerpi, mels aim et plus est la pensee graindre, dont ie vos serf, dame, sachies de fi; si m'a uers uos fine amor enhardi, douce dame, ne l'aies en viltance; cuer bien apris herbergies en vaillance, ne m'ocies, ie ne l'ai deservi! |
|
| Mon cuer aves, tres bone dame chiere, puis qu'Amors l'a mis en vestre dangier; ie ne l'en doi partir ne traire arriere: mels aim morir que l'en voie esloignier, car uns espoir me dit et fait cuidier c'oncore aurai recovrier a la ioie la ou par droit auenir ne devroie. Or mi puist Dieu et fine Amor aidier! |