Tu sei qui

Revisione di Edizione diplomatico-interpretativa del Sab, 01/09/2018 - 10:07

I
P Our la moillor con ques formast nature chant en espoir dauoir alegement. ainz dex ne fist si bele creature. tou te ualors en li croit et reprent ce me semont de chanter lie ment que tant la sai bele et uaillant et sage. si uoirem(en)t com laing de fin corage soi ent par li alegi mi torment.	Pour la moillor c'onques formast Nature chant en espoir d'avoir alegement. Ains Deus ne fist si bele creature, toute valers en li croit et reprent; ce me semont de chanter liement: que tant la sai bele et vaillant et sage. Si voirement com l'aing de fin corage, soient par li alegi mi torment.
II
M ais ensi est que raisons et droiture dient que iai esploi tie folem\|t en tant que iai t(ro)p haut mise ma cure. mais ce quamors me coma(n)de (et) apre(n)t ne porroie refuser sans outra ge. qui bien la sert mieus en uaut souuaige. por ce fait bon deuenir de sa gent.	Mais ensi est, que Raisons et Droiture dient que j'ai esploitie folement en tant que j'ai trop haut mise ma cure, mais ce qu'Amors me comande et aprent ne porroie refuser sans outrage: qui bien la sert mieus en vaut son aaige, por ce fait bon devenir de sa gent.
III
P or ce la ser. nu(n)s hons ne sen doit faindre damour seruir. car touz biens uient de li. ma ioie puet esforcier et estai(n)dre. si doucem(en)t conques ne la se(n)ti. embla mon cuer (et) madame en saisi. qui bien me puet a legier ma greuance. et se li plait q(ue) miure en atendance si laing ie tant q(ui)l me plait bien ainsi.	Por ce la ser, nuns hons ne sen doit faindre d'amour servir, car tous biens vient de li: ma joie puet esforcier et estaindre si doucement c'onques ne la senti; embla mon cuer et ma dame en saisi, qui bien me puet a legier ma grevance, et se li plait que miure en atendance , si l'aing ie tant qu'il me plait bien ainsi.
IV
Q uant plus me uoi g(ue)rroier (et) dest(a)indre des maus damors qui ne mont pas guerpi. et qua(n)t mieus ai ma pe(n)see est plus graindie. donc ie uous serf dame sachiez de fi. si ma us uos fine amor enhardi. douce dame ne la iez en uiltance. cuer bie(n)ap(ri)s h(er)bergiez en uailla(n)ce ne mo cies ie ne lai des(er)ui.	Quant plus me voi guerroier et destraindre des maus d'amors qui ne m'ont pas guerpi, et quant mieus aim ma pensee est plus graindre, donc ie vous serf, dame, sachiez de fi; si m'a vers vos fine Amor enhardi, douce dame, ne l'aiez en viltance; cuer bien apris herbergiez en vaillance, ne m'ociés, je ne l'ai deservi.
V
M on cuer auez tres bone dame chiere. puis q(ua)mours la mis en u(est)re dong(er). ie ne len doi p(ar) tir ne t(ra)ire arriere. mius ain morir q(ue) len uoie esloignier. car uns espoirs medit (et) fait cuidier q(ua)ncor aurai rocou(ri)er a la ioie la ou par droit aue nit ne deuroie. or mi puist dex (et) fine amour aidier.	Mon cuer avez, tres bone dame chiere, puis qu'Amours l'a mis en vestre dongier; je ne l'en doi partir ne traire arriere: mieus ain morir que l'en voie esloignier, car uns espoirs me dit et fait cuidier qu'ancor aurai rocouvrer a la joie la ou par droit avenir ne devroie. Or mi puist Deus et fine Amour aidier.