| I | |
|---|---|
| Pour la moillor c'onques formast Nature chant en espoir d'auoir alegement. Ains Deus ne fist si bele creature, toute valers en li croit et reprent; ce me semont de chanter liement: que tant la sai bele et vaillant et sage. Si voirement com l'aing de fin corage, soient par li alegi mi torment. |
|
| II | |
| Mais ensi est, que Raisons et Droiture dient que i'ai esploitie folement en tant que i'ai trop haut mise ma cure, mais ce qu'Amors me comande et aprent ne porroie refuser sans outrage: qui bien la sert mieus en vaut son aaige, por ce fait bon devenir de sa gent. |
|
| III | |
| Por ce la ser, nuns hons ne sen doit faindre d'amour servir, car tous biens vient de li: ma ioie puet esforcier et estaindre si doucement c'onques ne la senti; embla mon cuer et ma dame en saisi, qui bien me puet a legier ma grevance, et se li plait que miure en atendance , si l'aing ie tant qu'il me plait bien ainsi. |
|
| IV | |
| Quant plus me voi guerroier et destraindre des maus d'amors qui ne m'ont pas gurpi, et quant mieus aim ma pensee est plus graindre, donc ie vous serf, dame, sachiez de fi; si m'a vers vos fine Amor enhardi, Douce dame, ne l'aies en viltance; cuer bien apris herbergies en vaillance, ne m'ocies, ie ne l'ai deservi! |
|
| V | |
| Mon cuer aves, tres bone dame chiere, puis qu'Amours l'a mis en vestre dongier; ie ne l'en doi partir ne traire arriere: mieus ain morir que l'en voie esloignier, car uns espoirs me dit et fait cuidier qu'ancor aurai rocouvrer a la ioie, la ou par droit avenir ne devroie. Or mi puist Deus et fine Amour aidier! |
|