| Pour la meilleur c'onques formast Nature chant en espoir d'avoir alegement. Onc Deus ne fist si bele criature, toute biaute en li croist et reprent; ce me semont de chanter liement: que tant la sai bele et vaillant et sage. Si voirement com l'aim de fin corage, soient par li alegie mi torment. |
|
| Mes ensi est, que Resons et Droiture dient que i'ai esploitie folement en tant que i'ai trop haut mise ma cure, mes ce qu'Amors me coumande et aprent ne porroie refuser sans outrage: qui bien la sert mels en vaut son aage, pour ce fet bon devenir de sa gent. |
|
| Pour ce la serf, nus hons ne se doit faindre d'Amours servir, car tous biens vient de li: ma ioie puet efforcier et estraindre si doucement c'onques ne le senti; enbla mon cuer et ma dame en sesi, qui bien me puet alegier ma grevance, et s'il li plest que muire en atendance, si l'aim ie tant q'il me plest bien ausi. |
|
| Quant plus me voi guerroier et destraindre des maus d'amors qui ne mont pas guerpi, mes aim et plus est la pensee graindre, dont ie vous serf, dame, sachies de fi; si m'a vers vous fine Amour enhardi, Douce dame, l'aies en viltance; cuers bien apris herbegies en vaillance, ne m'ocies, ie ne l'ai deservi! |
|
| Mon cuer aves, tres bone dame chiere, puis qu'Amors l'a mis en vostre dangier; ie ne l'en doi partir ne trere arriere; mels aim morir qu'ele voi elloignier, car uns espoirs me dit et fet cuidier qu'ancor aurai recouvrier a la ioie la ou par droit avenir ne devroie. Or mi puist Des st fine Amour aidier! |