| |
Mout me plaisent a sentir
li ioli tourment
don Amours me fait languir
savereusement
pour la bele a cui me rent
ligement.
Sui siens sans ia departir;
si com ie l'aim, m'en doinst Amours ioir!
Trop miex vaurroie morir
ke la boin talent
d'amours m'esteust guerpir.
Ie ne voi comment
nus ait ioie s'il n'emprent
hardement
de loial Amour servir:
pour cou m'i tieng, ke boin s'i fait tenir.
Cascuns se doit enhardir
d'amer loiaument
et endurer et soffrir
deboinaurement
quanques boine Amours consent,
car plus rent
ke ne sacent deservir
cil ki de cuer otroient son plaisir.
Dame, ki le cuer avés
dont ia fui saisis,
proi vos ke ce soit vos gré
k'Amours l'ait assis
en vous: ia n'en iert vos pris
amenris,
et se g'i sui oubliés,
bien vous en soit li meffais pardounés.
Comment ke soie menés,
dame de haut pris,
ia n'iert de moi desevrés
li pensers iolis
ke i'ai d'estre fins amis,
car toudis
ert amours et loiauté
en moi, comment ke de vous soie amés. |
