 |
[K 174] mest(r)e. R(ichart). de semilli. Chancon ferai plain dire et de pensee. pour cele riens el mont qui plus magree. he las onques nama. de cuer qui li blasma. dex pour quoi escondit ma. el ma lamort donee. douce dame de p(ri)s. qui ie lo tant et pris. si ma u(ost)re amor sorpris plus uous aim q(ue) riens nee. |
 |
La fine amor q(ui) mest el cuer entree. nen puet partir cest dont chose passee. bien uoi tuer me puis. ou noier enun puis. car ia naurai ioie puis qua ma mor refusee. Douce. |
 |
Ele est et bele et blonde et acesmee. plus blanche assez que la flor en la pree. ne sai de son ator. nen chastiau ne entour. nule sen sui autor. de morir sil lig(r)ee. douce. |
 |
Douce dame qui iai tant desirree. ou iai tout mis cuer et cors et pensee. iames nul mal neust. ne morir ne deust. qui entre uoz braz geust. iusq(ue)s alainz iornee. Douce. |
 |
Cha(n)co(n) que iai par fine amor trouuee. ua devant luis si seras citolee. ou la tres bele maint. qui ma fet ennui maint. prie li quele maint ou ma ioie est finee. |