Daufin ge·us voil derainier,
vos e le comte Guion,
qe an en cesta saison
vos feistes buen guerrier.
E vos iurastes ob mei
e portastes me teu fei
com N'Aengris a Rainaut,
qi semblez dou pel liart.
Vos me laisastes aidier
por temor de garedon,
e car saviez q'a Chinon
ne n'a argen ne dinier;
e vos volez riche rei,
bon d'armes e qe·us port fei,
e ge sui chiche coart:
si·us virez de l'autra part.
Ancor vos voill demandier
d'Uissoire, si vos sie buen,
ni se·n prendres veniason
ni loiares soudadier.
Mas una ren vos otrei,
sibeus falsastes la lei:
bon guerrier a l'estendart
trovarez lo rei Richart.
Ge vos vi au comensier
large de gran mession;
mas puoi troves occhaison
qe por forz chateus levier,
laissastes don e domnei,
e corz e segre tornei;
tor neissa n'aiez regart
qe franssios son longobart.