

[D]aufin ie·us voill deresnier,
vos e le conte Guion,
que ain en ceste seison
vos feistes bon gerrier.
E vos iurastes ou moi
e portastes me tiel foi
com Aengrins a Rainart,
qui senblez dou poil liart.
Vos me lessastes aidier
por creime de geerdon,
e car savetz q'a Chinon
non a argen ni dinier;
e vos voletz riche roi,
bon d'armes qui vos port foi,
e ie sui chiche coart:
si·us viretz de l'autre part.
Encor vos voil demandier
d'Ussoire, si·l vos set bon,
ni si·n prendretz venieson.
ni loaretz soudadier.
Mas una ren vos outroi,
si bem fausastes la loi:
bon gerier a l'estendart
troveretz le roi Richart.
Ie vos vi au comencier
large de gran mession;
mes puis trovez echeison
que por fortz chastels levier,
leisastes don don e domnoi,
e corz e segre tornoi;
mes nos cal avoir regart
que francois son longouart.
Vai sirventes ie t'envoi
en Auergne, e di moi
as deus comtes de ma part
s'uimes funt pes, Diex los gart.
Que chaut si garz ment sa foi
q'escuiers n'a point de loi.
Mes de s'or avan se gart.
que n'ait en peior sa part.