Arnautz daniels
En est sonet cuend'e leri
fas motz e capud e doli
e seran verai e sert
qan n'aurai passat la lima
c'Amors m'aesplan'e∙n d'aura
mon cantar que de∙llei mueu
que mante pretz e governa.
Ados meillur et esmeri
que la gensor serv'e coli
del mon so∙us dic en apert
sieus son del pe tro qu'el sima
e si tot venta∙l freidura
l'amors qu'inz el cor me plou
mi ten caut on plus iverna.
Tan l'am de cor e la queri
c'a trop voler cug la∙m toli
s'om ren per ben amar pert
que∙l fis cors sobre trasima
lo mieu tot e non s'eisaura
tant ai d'amor fag renueu
c'obrator n'ai e taverna.
Non vol de Roma l'emperi
ni c'om m'en fass'apostoli
q'en lei non aia revert
per cui o m'art lo cors e∙m rima
e si midonz no∙m restaura
l'amor que dal cor m'es mueu
o n'ausi e si enferna.
Mil messas n'aug e∙n proferi
e∙n fas lum de ser'e d'oli
que Dieus mi don bon esert
de∙llei que∙m venz ses escrima
e can remir sa crin saura
e son blanc cors fresc e nueu
mais l'am que qui∙m des Luserna.
Ges pe∙l maltrag qe∙n soferi
de ben amar no∙m destoli
lei anz dic en descubert
c'aissi∙m faill los motz e∙l rima
pietz trac aman un ueu
cel de Monclin N'Audierna.
Eu son Arnau c'amas l'aura
e caz la lebre a lo bueu
e nadi contra suberna.