|
Arnautz daniels
Enest sonet cuende le
ri. fas motz ecapud
edoli. Eseran uerai
esert. Qan naurai pa
ssat la lima. Camors
maes plane(m) daura.
Mon cantar q(ue) dellei
mueu. Que mante pretz egouerna.
|
Arnautz Daniels
En est sonet cuend'e leri
fas motz e capud e doli
e seran verai e sert
qan n'aurai passat la lima
c'Amors m'a e splan'e∙m d'aura
mon cantar que de∙llei mueu
que mante pretz e governa.
|
|
Ades meillur et es
meri. Que la ge(n)sor
seru ecoli. Del mon sous dic en apert. Sieus
son del pe tro quel sima. Esitot uental freidu
ra. Lamors quinz el cor me plou. Mi ten caut on plus iuerna.
|
Ades meillur et esmeri
que la gensor serv'e coli
del mon so∙us dic en apert
sieus son del pe tro qu'el sima
e si tot venta∙l freidura
l'amors qu'inz el cor me plou
mi ten caut on plus iverna.
|
|
Tan lamde cor e laqueri. Ca trop uoler
cug lamtoli. Som ren per ben amar pert.
Quel fis cors sobre trasima. Lo mieu tot e
non sei saura. Tant ai damor fag renueu.
Cobrator nai etauerna.
|
Tan l'am de cor e la queri
c'a trop voler cug la∙m toli
s'om ren per ben amar pert
que∙l fis cors sobre trasima
lo mieu tot e non s'eisaura
tant ai d'amor fag renueu
c'obrator n'ai e taverna.
|
|
Non uol de roma lemperi. No com me(m)fas
ia postoli. Qen lai no(n) aia reuert. percui o
mart lo cors em rima. Esi midonz nom re
staura. Lamor que dalcor mes mueu. Onau
si esi enferna.
|
Non vol de Roma l'emperi
ni c'om m'en fass'apostoli
q'en lei non aia revert
per cui o m'art lo cors e∙m rima
e si midonz no∙m restaura
l'amor que dal cor m'es mueu
o n'ausi e si enferna.
|
|
Mil messas naug enproferi. Enfas lum de
seredoli. Que dieus midon bon esert . Dellei
quem uenz ses escrima. Ecan remir sa crin sa
ura. Eson blanc cors fresc enueu. Mais la(m)
que quim des luserna.
|
Mil messas n'aug e∙n proferi
e∙n fas lum de ser'e d'oli
que Dieus mi don bon esert
de∙llei que∙m venz ses escrima
e can remir sa crin saura
e son blanc cors fresc e nueu
mais l'am que qui∙m des Luserna.
|
|
Ges pel mal trag qen soferi. De ben amar
nom destoli. Lei anz dic endescubert. Caissim
faill los motz el rima. Pietz trac aman com
que laura. Canc plus non amet unueu. Cel
de mon clin naudierna.
|
Ges pe∙l maltrag qe∙n soferi
de ben amar no∙m destoli
lei anz dic en descubert
c'aissi∙m faill los motz e∙l rima
pietz trac aman c'om que laura
c'anc plus non amet un ueu
cel de Monclin N'Audierna.
|
|
Eu son arnau camas laura. Ecaz la lebre
alobueu. Enadicontra suberna.
|
Eu son Arnau c'amas l'aura
e caz la lebre a lo bueu
e nadi contra suberna.
|
