| I | |
| Au tans plain de felonie denuie (et) de traison. de tort (et) de mespriso(n) sans b(ie)n (et) sans cortoisie (et) ke entre nos barons faisons tout le siecle empirier ke ie uoi escumenier. ceaus ki plus offre(n)t raiso(n) lors uoil dire une cancon |
Au tans plain de felonie, d’envie et de traïson, de tort et de mesprison, sans bien et sans cortoisie, et ke entre nos barons faisons tout le siecle empirier, ke je voi escumenïer ceaus ki plus offrent raison, lors voil dire une cançon. |
| II | |
| Liroiaumez de surie nous dist (et) crie a haut ton. se nous ne nous amendons pour dieu ke ni alons mie ni feriens se mal non. diex aime fin cuer droiturier de tex gens se ueut aidier cil essauceront son non. (et) conquerront sa maison. |
Li roiaumez de Surie nous dist et crie a haut ton, se nous ne nous amendons, pour Dieu! Ke n’i alons mie: n’i feriens se mal non. Diex aime fin cuer droiturier, de tex gens se veut aidier; cil essauceront son non et conquerront sa maison. |
| III | |
| Encoire aim miex toute uoie demorer ou saint pais. ke aler poures chaitis la ou ie solas nauroie. phelippe on doit paradis conquerre pour mal auoir. ke uous ni troueres uoir bon estre ne ieu ne ris ke uous auies apris. |
Encoire aim miex toute voie demorer ou saint païs ke aler povres, chaitis la ou ja solas n’avroie. Phelippe, on doit Paradis conquerre pour mal avoir, ke vous n’i troveres, voir, bon estre ne jeu ne ris que vous avïes apris. |
| IV | |
| Amors a couru emproie (et) si men maine tout pris en lostel ce mest auis dont ia issir nen q(ue)r roie sil estoit amon deuis. dame cui beautes fet oir ia de prison nistrai uis ainz morrai loialz amis. |
Amors a couru em proie et si m’en maine tout pris en l’ostel, ce m’est avis, dont ja issir n’en querroie s’il estoit a mon devis. Dame, cui beautes fet oir, ja de prison n’istrai vis, ainz morrai loialz amis. |
| V | |
| Dame moi couient remaindre de uous ne me quier par tir. de uous amer (et) seruir. ne me seuc onques ior faindre. si me uaut bien .i. morir lamors qui masaut souent ades uostre merci atent. ke b(ie)ns ne me puet uenir sen est par uostre plaisir. |
Dame, moi covient remaindre, de vous ne me quier partir. De vous amer et servir ne me seuc onques jor faindre, si me vaut bien un morir l’amors qui m’asaut sovent. Adés vostre merci atent, ke biens ne me puet venir, se n’est par vostre plaisir. |
| VI | |
| Chancon ua moi dire lorent q(ui)l se gart outreement de grant folie envair. quen lui auroit faus mentir |
Chançon, va moi dire Lorent qu’il se gart outreement de grant folie envair, qu’en lui avroit faus mentir! |