| c. 184 | |
 |
Bertrans de born. xxiij. Quan la novella flors par el vergan on son vermeill, vert e blanc li brondel, ab la doussor q'eu sent al torn de l'an chant autresi cum fant li autr'ausel; car per auzel me teing en mantas res, car aus voler tot lo mieills quel mon es! Voler l'aus eu, et aver cor volon, mas no°il aus dir mon cor, anz lo°il rescon. Eu non sui drutz ni d'amor non feing tan qu'en razon dompna d'amor ni m'apel, ni non dompnei; e si°m val atretan, que lausengier fals, enoios, fradel, desenseignat, vilan e malapres. An de mi dit, tant en son entremes, que fant cujar que la gensser del mon
|
| c. 184 v. | |
 |
mi tenga gai, gauzen e desiron. C'om ses dompna non pot far d'amore chan, mas sirventes farai, fresc e novel. Puis chastiar cuidon en gerrian nostre baron lo seignor de Bordel, e per forsar tornar franc e cortes, mal estara, s'ancar vilans non es tant que chascuns aia gauch si°l respon, e no°ls enoi si be°ls pela ni°ls ton. Antra aura s'aissi pert son afan en Limozin on a traich tant cairel e tanta tor, tant mur e tant anvan fraich e sesfaich, e fondut tant castel e tant aver tolt e donat e mes e tant colp dat e receubut e pres e tanta fam, tanta set e tant son cum el a traich d'Agen tro a Nontron. Rassa, per vos remanon saiclaman en Limozin, de sai vas Monmaurel; per vostre pro avetz faich de lor dan, Som dis n'aimars, el seigner de Martel, en taillafer, engol fautz eniofres, etut aisel quen vos seron enpres. Non ant las paz gens per vos en que son, anz fant lor grat lai al comte Raimon. Sirventes, vai an Raimon Gausseran lai a Pinos, q'en ma razon l'espel car tant aut son siei dich e siei deman de leis que ten Cabrieira e fon d'Urgel. a mon Fraire en ren gratz e merces de Bergidan, del fin joi que m'enqes, que tot mon cor en tornet gauzion quan nos partim amdui el cap del pon. Si cum l'auzeill son desotz l'aurion son las autras sotz la genssor del mon. |