I.
Atressi·m pren quom fai al joguador,
qu’al comensar jogua mayestrilmen
a petits juecs, pueis s’escalfa perden,
que·l fai montar tant qu’es en la folor;
aissi·m mis ieu pauc e pauc en la via,
que cujava amar ab mayestria
si qu’en pogues partir quan me volgues,
on sui intraz tan qu’issir non puesc ges.
II.
Autra vetz fui en la preizon d’Amor,
don escapei, mas aora·m repren
ab un cortes engienh tan sotilmen
que·m fai plazer mo mal e ma dolor,
qu’un latz me fetz metr’al colh ab que·m lia,
don per mon grat mais no·m desliaria;
e nulhs autr’om que fos liatz non es,
qui·l deslies, que ben no li plagues.
III.
Anc mais nulh temps no trobei liador
tan ferm lies ab tan pauc liamen,
que·l liams fo d’un douz bays solamen,
don non truep sai qui·m desli ni alhor.
Enliamatz sui tan que, si·m volia
desliamar, ges far non o poiria,
qu’Amors, que lai m’enliamet e·m pres,
m’enliama sai plus fort per un tres.
IV.
A ley del fer que va ses tirador
vas l’aziman que·l tira vas si gen,
Amors, que·m sap tirar ses tiramen,
mas tirat m’a sevals per la melhor;
car si d’autra melhuirar me sabia,
tant am lo mielhs que be·m melhuiraria,
mas melhuirar no cre que m’en pogues:
ve·us per que m’a part las melhors conques.
V.
A! gentils cors formatz plus gen que flor,
aiatz de me qualacom chauzimen,
quar muer per vos d’envej’e de talen;
e podetz o proar a ma color,
qan vos remir, que·s trasva e·s cambia,
per que fora almorn’e cortesia
qu’Humilitatz mercejan vos prezes
d’aquest cochat, sofrachos de totz bes.
VI.
Be·m platz Guillems Malespina·l marques,
quar conquier Pretz e Pretz a lui conques.
VII.
Na Beatritz d’Est, lo bes qu’en vos es
fa melhoirar las autras ab lors bes.