| I | |
| Belle et bone est celle por cui je chans, s'en doie bien mes chansons enmeudreir. Pues celle houre ke je la vi avant ne pou aillors c'a li mon cuer torneir, maix mult sovent me tormente et esmaie ceu ke je l'ai tant servie en menaie, n'ains ne me volt de riens gueridoneir fors solement c'apris m'ait a chanteir. |
|
| II | |
| Contesse a droit la doit on apelleir de tous solais et de tous avenant. S'outrajous fui de hautement penseir, sovent m'en vient mes biaus forfais avant. Cruousement et nuit et jor m'essaie loiaul amor, ke de riens ne m'apaie tant me trus fin et me veult esproveir. Ke Deus me doinst morir ou recovreir! |
|
| III | |
| Mercit puis bien de fin cuer desirier et requerre bonement en chantant car autrement ne li os demandeir, ke trop redout les biens dont ait tant. Je ne di pais ke de vos me retraie, douce dame, por dolor ke j'en aie, je n'ai pooir de vos entreoblieir. Or me doinst Deux en vos mercit troveir! |
|
| IV | |
| Por deu, Amors, se vos en mon vivant de nulle rien me deveis conforteir, por coy vos plaist moy a travillier tant? De tous amans en faites a blaimeir, je ne di pais ke bien ne m'en eschaie, mercit aurai de fine amor veraie ou je morrai fins amans sens fauceir e vos c'Amors ne me puet plux greveir. |