| reambautz daurenga. Un uers farai de tal mena. ont ueil qe mos cors paresca. mas tant ai rich entendensa. p(er) qe nestauc en bestensa. qe non pusca complir mon gaug canz tem cun sol iorn nom uiua. tant es mos dezirs faitz lentz. |
| Jns e mon corsi semena. uns uolers e cug qen cresca cun ioi qen mettal crezensa. qe dals non ai souinensa ni res qe sagues nom fa gaug. an lais e mos cors esquiua autre ioi qe de me non a sai. |
| Per no sai qe tan grant pena. qinz el cor mi uais em tresca. non trais om senes pendensa. con eu qe bella. Paruensa. noi ai fort duncs. p(er) qe nai gaug cart uns uolers men abriua qem diz. qezin altra non poin. |
| Bema nafrat ental uena. esta mortz caram uen fresca don nuls metges de proensa. nadius nompot far ualenza. ni mezina qen faza gaug ni ia non cre qe sescrima. lo male qe inz al cors mescon |
| Camors ma mes tal cadena pus dols mes qe meis de bresca. can mos pensars men comensa. pois pens qe desirs non uensa. loncs p(er) qe torn emplor mon gaug e uanc cosa res pensina. car non aus mos trar mon bezoin. |
| Ben ai ma uoluntat plena. datal sen qe son trebesca. e cug qe maia tenensa. car nuls hom mais p(er) pleuensa. nomen poiria faire gaug dona sun fossetz aiziua tost saubra sen fol men per oin |
| Mas il no(n) sap. cal estrena. ma dada nim com adesca car tan sospretz sobre gensa qil non cre qeu p(er) temensa. auzes ges de lieis auer gaug car estan nomen atiua. tem si lio dic qe men vergoin. |
| Dusbes granz talanz afrena mon cor car sens aiga pesca. pos noil los puesc a presenza. dir deus lien dom conoisensa. a lieis tal ca me torn en gaug qest uers farai qem caliua. dir lai on ab lieis pretz sajoin. |
| Rics soi si lenten enagaug mas eu non scai p(er) qem uiua sil Coneis e pos non na soin. |
| Non deg entendre mal mon gaug qel bos es espers vol qe uiua. El mals mentra don non ai soin. |