| I | |
| A tresim pren com fai al ioguador. cal comensar iogua maistralmen. apetitz iuecx pueis sescalfa perden. quel fai montar tro ques enlafolia. aisim mis ieu pauc epauc enlauia. quieu cuiaua a mar abmaestria. si quen pogues partir quan mi volgues. on soi intratz tan quei sir non puesc ges. |
Atressi'm pren quom fai al Ioguador, qu'al comensar iogua maistralmen a petits iuecs, pueis s'escalfa perden, que'l fai montar trop qu'es en la folia, aissi'm mis ieu pauc e pauc en la via, quieu cuiava amar ab maestria si qu'en pogues partir quan mi volgues, on soi intraz tan que issir non puesc ges. |
| II | |
| A utrauetz fui enla preizon damor. don escapei mas auram repren. abun cortesen genh tan sotilmen. q(ue)m fai plazer mon mal ema dolor. cun latz mi fes metrel col abquem lia. don permon grat mais n om desliaria. enuils autrom que fos liatz non es. quil deslies que ben nonli plagues. |
Autra vetz fui en la preizon d'amor, don escapei mas aora'm repren ab un cortes engenh tan sotilmen que'm fai plazer mon mal e ma dolor, q'un latz mi fetz metr' el colh ab que'm lia, don per mon grat mais no'm desliaria e nulhs autr' om que fos liatz non es, qui'l deslies que ben non li plagues. |
| III | |
| Anc mais nuill tems no trobei liador. tan ferm lies abtan pauc liamen. quel li ams fo dun bais solamen. don no truep sai quim desli ni aillor. enliamatz soi tan que sim uolia. desliamar ges far non ho poiria. camors quel liament ha pres. men liama sai plus fort perun tres |
Anc mais nullh temps no trobei liador Tan ferm lies ab tan pauc liamen, quel liams fo d'un bais solamen, don no truep sai qui'm desli ni aillor. Enliamatz soi tan que si'm volia desliamar ges far non hopoiria; qu'amors quel liament ha pres, m'enliama sai plus fort per un tres. |
| IV | |
| Alei delfer que uai ses tirador. ues lazima(n) quel tira uai seguen. amor q(ue)m sap tirar ses tiramen. mas tirat ma siuals per lage(n)sor. quar si dautra meillurar me sabia. tant am lo mieils que bem meilluiaria. mas meillur non cre que men pogues. ueus perque ma part las meillors conques. |
A lei del fer que vai ses tirador vas l'aziman que'l tirava e seguen amors, que'm sap tirar ses tiramen, mas tirat m'a sivals per la gensor quar si d'autra meillurar me sabia, tant am lo mieils que be'm meilluiaria mas meillur non cre que m'en pogues. ve'us per que m'a part las meillors conqes. |
| V | |
| Na gentil cors format plus gent de flor. aiatz demi calacom chauzimen. quar mu er per uos denuei ede talen. epodetz ho pr oar ama color. quan uos remir que tras uai es cambia. perque fora grans cortezia. cumelitat merceian uos prezes. daquest coi tat sofraitos detotz bes. |
Na gentils cors, format plus gent de flor, aiatz de mi qualacom chauzimen, quar muer per vos d'envei e de talen e podetz ho proar a ma color, quan vos remir, que's trasvai e's cambia, per que fora grans cortezia q'umelitat merceian vos prezes d'aquest coitat sofraitos de totz bes. |
| VI | |
| Bem platz guilem malespinal marques. quar conquer pretz epretz ha lui conques. |
Be'm platz Guilem Malespina'l marques, quar conquer pretz e pretz ha lui conques. |
| VII | |
| Nabiatritz daquest ben quenuos es. faitz meillurar las autras ablur bes. aimeric |
Na Beatritz d' aquest ben qu'en vos es faitz meillurar las autras ab lor bes. Aimeric |