|
[B]En auetz entendutz los mals quen bertrans
de born reme(n)bret. quel reis darrago(n) auia faitz de lui edautrui. Et acap duna gransa- son quel nac apres dautres mals quelauia faitz |
Ben avetz entenduz los mals quen Bertrans De Born remenbret que·l reis d’Arragon avia faitz de lui e d’autrui. Et a cap d’una gran sason qu’el n’ac apres d’autres mals qu’el avia faitz, li lo·l volc retiaire en un autre sirventes. E fon dig a·N Bertran c’un cavallier avia en Arragon que avia nom N’Espaingnols, et avia un bon castel molt fort que avia nom Castellot et era proprietar d’E n Espaingnol et era en la forteressa de Sarrazins, don el fazia grant guerra als Sarrazis. E·l reis si entendia molt en aquel chastel, e venc un iorn en aquella encontiada, per servir lo e per envidarlo al sieu castel, e menet lo charament, lui ab tota soa gent. E·l reis, quant fon dedinz lo castel, lo fetz penre et menar deforas e tolc lo castel. E fon utatz que quant lo reis venc al servizi del rei Enric, lo coms de Tolosa si·l desconfis en Gascoingna e tolc li ben cinquanta cavalliers; e·l reis Enrics li det tot l’aver que·ill cavallier devian pagar per la reenson, et el no·l paguet l’aver als cavallier, anz l’en portet en Arragon. E·ill cavallier isseron de preisson e pageron l’aver. E fon vertatz cus ioglars, que avia nom Artuset, li prestet .cc. marabotis; e menet lo ben un an ab si e no·ill en det denier. E cant venc un dia, Artuset ioglars si se meslet ab un Iuzieu […] juzieu, li vengron sobre e nafreron Artuset [...]men, lui et un son conpaignon. Et Artuset et us sos conpaings accuseron un Iuzeu, don li Iuzeu aneron al rei e pregueron lo qu’el en fezes vendeta e que lor des Artus e·l conpaignon per aucire, e qu’ill li darian .cc. marabotis. E·l reis los lor donet amdos epres los .cc. marabotis. E·ill Iuzieu les feiron ardre lo iorn de la nativitat de Crist, si com dis Guillems de Berguedam en un sieu sirventes, dizen en el mal del rei: “E fetz una mespreison
Don hom no·l deu razonar, Qu’el iorn de la Naison Fetz dos crestias brusar: Artus ab autre, son par. E non degra aiti iutgar A mort ni a passion Dos per un Iuzeu fellon.” Don us autre, que avia nom Peire Ioglar, li prestet deniers e cavaus; et aquel Peire Ioglars si avia grans mals ditz de la veilla reina d’Englaterra, la quals tenia Font-Ebrau, que es una abadia on se rendon totas las veillas ricas. Et ella lo fetz ausire per paraula del rei d’Arragon. E totz a questz laich faich remenbret En Bertrans de Born al rei d’Arragon en aquest sirventes que dis: “Quant vei per vergiers despleiar los cendaus grocs, indis...” etc. |