| Arnaut daniel En breu briza.l tems braus e.l biz’e.l brueils n’e.l brancx qui s’entretonon trastug de sobre claus rams de fueilla: qu’ar no chanta auzels ni poilla, m’ensenh’Amors qu’ieu fassa donc tal chan que n’er segons ni tertz, ans prims de frans quar coratge. |
|
| Amor es de pretz la claus e de proeza us estancx, don naison tug li bon frug si es qui leialmen los cueilla, que un non delis gels ni mueilla mentre que.l noms el bon tronc; mas si.l romp trefas ni cuill vertz, mor tro leial lo sagre. |
|
| Faillirs emandatz es laus; e ieu senti.m n’ams los flancx que mais n’ai d’amor ses cug que tals qu’en parla e.s n’orgueilla, que peitz me fa.l cor de frueilla; mentre’ela.m fes semblan enbronc, mais volgrui trair pen’el dezert on anc non ac d’auzels agre. |
|
| Bona dona e suaus e cor leial, suptils e francx mand’amor al ferm condug de lieis don plus vueill que.m tueilla, quar, si.m fo fera e escueilla, er iauzen breuia.n tems lonc, qu’ill m’es plus fina e ieu lieis sers que Talant’e Meleagre. |
|
| Tan dopti qu’ieu per non aus devenc soven vertz e blancx; si m’a.l sen Dezirs forsdug no sap lo cors trep’e.s dueilla; mas ioitz qui despen ma fueilla m’encolpa quar no la semonc, per que soi de pretz tant espertz non ai d’als talan neis magre. |
|
| Pensar de lieis m’es repaus e tragua.m ams los hueils crancx s’a lieis vezer no.ls estug; e.l cor non crezatz qu’en tueilla quar oras, ni iocx, ni violas no.m pot de lieis e’travers iornc partir; c’ai dig? Dieus, tu.m somertz o.m peris el peleagre. |
|
| Arnautz vol sos chans si’ufertz lai on dous motz mou en ‘agre’. |