|
Arnautz Daniel L’aur’amara fa.ls bruels brancutz clarzir, que.l dous’espeys’ab fuelhs, e.ls lecx becx dels auzels ramencx te balbtz e mutz, pars e non pars, per que m’esfors de far e dir plazers e manhs per ley qui m’a virat d’aut bas, don tem morir si l’afans no m’asoma. |
|
|
Tan fo clara ma prima lutz, desir, don cren cor los huelhs, non precx necx d’autra, si.s lutz rars mos preyars: pero deportz m’es e auzir volers, bos motz s’es grey de lieys don tan m’azaut qu’al sieu servir suy del pe tro al coma. |
|
|
Amors, guara! suy be vengutz? Qu’auzir tem far, si.m dezacuelhs, tals dex precx, que t’es mielhs que.t trencx, qu’ieu suy fis drutz, cars e non avars; ma.l cors fers fortz me fai suffrir mainhs vers, qu’ap tot lo ney, m’agr’ops us baysal caut cor refrezir, que no.y val autra goma. |
|
|
Si m’ampara, silh que m’elutz, d’auzir si qu’es de pretz capduelhs, del quecx precx qu’ai dedins a rencx l’er for rendutz clars mos pensars: qu’ieu fora mortz, mas fa.m suffrir l’espers que.lh prec que.m grey, qu’aisso.m te let e baut, que d’als iauzir. no.m val ioys una poma. |
|
|
Doussa cara ab totz ayps volgutz, sofrir m’er per vos manhs erguelhs, quar etz decx de totz fadencx, don ai manhs brutz pars; e guabars de vos no.m tortz, ni.m fay partir avers, c’anc non amey ren tan an d’ufaut, ans vos dezir plus que Dieus selh de Doma. |
|
|
Ara.t parra, chans e condutz, formir al rey qui t’er escuelhs, quar precx, secx say, e lay es doblatz, f. 206 v e mantengutz dars e manjars: de ioy lay portz. Son anel mir, si.l dars qu’anc non estey iorn d’Araguo que.l saut no.y volgues ir; mas sai m’an clamat: roma! |
|
|
Faitz es l’acortz: qu’el cor remir totz sers lieys cuy dompney, ser parsonier Arnaut, qu’en autr’albir n’esfort m’entent’a soma. |