|
Arnautz Daniel
AUtet e bas, entre.ls prims fuelhs, son nou de flors el ram li renc, e no.y te mut bec ni guola nuls auzels, ans bray e canta quadaus en son us: per ioy qu’ai d’els e del temps chan, mas Amors mi assauta que.ls motz ab lo so acorda. |
|
|
Merce, Amors, qu’ar acuelhs! Tart mi fo, mas en grat m’o prenc, quar, si m’art dins la muelha lo fuecx, no vuelh que s’escanta; mas pels us estauc clus, qui d’autruy ioy fan grans gems, e pus ben l’a en sa guauta selh qu’ab lieys se dezacorda. |
|
|
Dieu o grazisc e a mos huelhs, que per lor conoyssensa.m venc ioys, qu’a dreyt aney e fola l’ira qu’ieu n’aui e l’anta; ar vai sus qui que.n mus d’amor, don suy fis e ferms, qu’ab lieys qu’al cor plus m’azauta suy liatz ab ferma corda. |
|
|
De bon’amor falsa l’escuelhs, e drutz es tornatz en fadenc qui di que.l parlar no.l cola nulha re qu’al cor crebanta de pretz us, quar enfrus es d’aquo qu’ieu molt ai crems; e qui de parlar trassauta dreitz es que la lenguas morda. |
|
|
Vers es qu’ieu l’am, e es erguels: mas ab iauzir celat lo tenc; qu’anc, pus Sainh Paul fe pistola ni nuls hom deius no pot plus neys Ihesus far de tal, quar absemps a.ls bos ayps quar es plu auta selha qu’om per pros recorda. |
|
|
Pretz e valors, vostres capduelhs es la belha qu’ab si.m retenc, qui m’a sol e ieu lieys sola, qu’autr’el mon no m’atalanta, ans suy brus e estrus a las autras e.l cor tenc prems; mas pel sieu ioy trepa e sauta no vuelh qu’autra m’o comorda. |
|
|
Arnautz ama e non di nemps, qu’Amors m’afrena la guanta que fols guaps non la comorda. |