| I | |
| [A]b ioi(e)ab ioven ma pais. eiois eiove(n)s ma paia. que mos amics es lo plus gais. p(er) q(ie)u sui coindeta egaia. epois eu li sui ue raia. beis taing qel me sia uerais. canc de lui amar nomestrais. niai cor q(ue) men estraia. |
Ab ioi e ab ioven m’apais e iois e iovens m’apaia; que mos amics es lo plus gais, per q’ieu sui coindet’e gaia; e pois eu li sui veraia, be ·is taing q’el me sia verais, c’anc de lui amar no m’estrais, ni ai cor que m’en estraia. |
| II | |
| Mout mi plai car sai q(ue)ual mais. cel qieu plus desir q(ue)maia. ecel que primiers lomatrais. dieu prec que gran ioi latraia. equi q(ue) mal len retraia. non creza fors quiel retrais. com cuoill maintas uotz los balais. abqel mezeis se balaia. |
Mout mi plai car sai que val mais cel q’ieu plus desir que m’aia, e cel que primiers lo m’atrais Dieu prec que gran joi l’atraia; e qui que mal l’en retraia, no ·l creza, fors so qu’ie ·l retrais: c’om cuoill maintas votz los balais ab q’el mezeis se balaia. |
| III | |
| Dompna q(ue)en bon pretz senten. Deu ben pausar sentendenssa.en un pro cauallier ualen. pos ill conois saua lenssa. q(ue)laus amar apresenssa.e dompna pois ama apresen. ia poisli pro ni li ualen. non diran mas aui nenssa. |
Dompna qu’en bon pretz s’enten, deu ben pauzar s’entendenssa en un pro cavallier valen, pos ill conois sa valenssa; que l’aus amar a presenssa e dompna, pois am’a presen, ia pois li pro ni li valen no ·n diran mas avinenssa. |
| IV | |
| Qieu nai chausit un pro e gen. p(er)cui pretz meillura egenssa. larc e adreig econoissen. on es sens e conoissenssa. prec li non aia entendenssa. ni hom noil puosca far crezen. qieu fassa uas lui faillimen. sol non trob enlui fail lenssa. |
Q’ieu n’ai chausit un pro e gen per cui pretz meillur’e genssa larc e adreig e conoissen on es sens e conoissenssa; prec li que m’aia crezenssa ni hom no ·l puosca far crezen q’ieu fassa vas lui faillimen, sol non trob en lui faillenssa. |
| V | |
| Amics la uostra ualenssa. sabon li pro eli ualen. p(er) qieu uos qier deman tenen. suis platz uostra ma(n)tenenssa. |
Amics la vostra valenssa sabon li pro e li valen, per q’ieu vos qier de mantenen, si ·us plai vostra mantenenssa. |