| G Villems decabestaing si fo us ca ualliers delencontrada de ros sillonque confina ab cataloigna (et) ab narbones. Mout fo auinens hom dela p(er)sona emout presatz darmas ede corte sia edeseruir. Et auia enla soa enco trada una dompna que auia nom ma dona soremonda. moiller den Raimon de castel rossillon. que era mout gentils erics emals ebraus efers (et) orgoillos. En Guillems decabestaing si amaua la dompna p(er) amor. echantaua delieis enfazia sas chanssos. E la dompna q(ue)ra ioues egaia egentils ebella sil uolia ben mais qe aren delmon. Efon dich so an Raimon decastel rossillon. (et) el cu(m) hom iratz egolos enqeric tot lo faich esaup que uers era. efetz gardar la moiller. eqan uenc un dia Raimons decastel rossillon trobet paissan Guillem de cabestaing ses gran compaignia et aucis lo. efetz li traire lo cor del cors. e fetz li taillar la testa. el cor fetz portar a son alberc. ela testa atressi. efetz lo cor raustir efar apebrada efetz lo dar amaniar ala moiller. Eqan la do(m)pna lac maniat Raimons decastel rossil lon li dis. sabetz uos so que uos auetz maniat. et elle dis non. si non que mout es estada bonauianda esabori da. et el li dis qel era lo cors den Guil lem decabestaing. so que ella auia maniat. et aso qellal crezes mieils si fetz aportar la testa denan lieis. e q(a)n la dompna uic so (et) auzic ella p(er)det lo uezer elauzir. Eqand ella reuenc si dis. Seigner ben mauetz dat si bon maniar que ia mais non maniarai dautre. Eqand el auzic so el cors ab ses paza euolc li dar sus enlatesta. (et) ella corsad un balcon elaisset se cazer ios. et enaissi moric. Ela nouella cors p(er) rossil lon ep(er)tota cataloigna qen Guillems decabestaing ela dompna eran enaissi malamen mort. eqen Raimons del castel rossillon auia donat lo cor den Guillem amaniar aladompna. Mout fo grans tristessa p(er) totas las encontra das. El reclams uenc denan lo rei da ragon que era seigner den Raimon de castel rossillon eden Guillem decabesta(n)g Euenc sen aperpignan enrossillon. efetz uenir Raimon decastel rossillon denan si. eqand fouengutz sil fetz prendre. e tolc li totz sos chastels els fetz desfar. e tolc li tot qant auia e lui enmenet en preison. Epois fetz penre Guillem de cabestaing ela dompna e fetz los portar a perpignan emetre en un monumen denan luis dela gleisa. efetz desseignar desobrel monumen cum ill eron estat mort. et ordenet p(er) tot lo comtat de rossillon que tuich licauallier e las dompnas lor uengesson far anoal chascun an. Eraimons decastel rossil lon moric en la preison del rei. |
Guillems de Cabestaing si fo us cavalliers de l’encontrada de Rossillon, que confina ab Cataloigna et ab Narbones. Mout fo avinens hom de la persona e mout presatz d’armas, e de cortesia e de servir. Et avia en la soa encotrada una dompna que avia nom Madona Soremonda, moiller d’En Raimon de Castel Rossillon, que era mout gentils e rics e mals e braus e fers et orgoillos. En Guillems de Cabestaing si amava la dompna per amor e chantava de lieis e·n fazia sas chanssos. E la dompna, qu’era ioves e gaia e gentils e bella, si·l volia ben mais qe a ren del mon. E fon dich so a·N Raimon de Castel Rossillon; et el, cum hom iratz e gelos, enqeric tot lo faich e saup que vers era. E fetz gardar la moiller. E qan venc un dia Raimons de Castel Rossillon trobet paissan Guillem de Cabestaing ses gran compaignia et aucis lo. E fetz li traire lo cor del cors e fetz li taillar la testa; e·l cor fetz portar a son alberc, e la testa atressi. E fetz lo cor raustir e far apebrada, e fetz lo dar a maniar a la moiller. E qan la dompna l’ac maniat, Raimons de Castel Rossillon li dis: «Sabetz vos so que vos avetz maniat?», et elle dis: «Non, si non que mout es estada bona vianda e saborida». Et el li dis q’el era lo cors d’En Guillem de Cabestaing so que ella avia maniat, et aso q’ella·l crezes mieils si fetz aportar la testa denan lieis; e qan la dompna vic so et auzic, ella perdet lo vezer e l’auzir. E qand ella revenc si dis: «Seigner ben m’avetz dat si bon maniar que iamais non maniarai d’autre». E qand el auzic so, el cors ab s’espaza e volc li dar sus en la testa, et ella cors ad un balcon e laisset se cazer ios; et enaissi moric. E la novella cors per Rossillon e per tota Cataloigna: q’En Guillems de Cabestaing e la dompna eran enaissi malamen mort, e q’En Raimons del Castel Rossillon avia donat lo cor d’En Guillem a maniar a la dompna. Mout fo grans tristessa per totas las encontradas. E·l reclams venc denan lo rei d’Aragon, que era seigner d’En Raimon de Castel Rossillon e d’En Guillem de Cabestang. E venc s’en a Perpignan en Rossillon, e fetz venir Raimon de Castel Rossillon denan si. E qand fo vengutz, si·l fetz prendre e tolc li totz sos chastels e·ls fetz desfar, e tolc li tot qant avia, e lui enmenet en preison. E pois fetz penre Guillem de Cabestaing e la dompna, e fetz los portar a Perpignan e metre en un monumen denan l’uis de la gleisa, e fetz desseignar de sobre·l monumen cum ill eron estat mort, et ordenet per tot lo comtat de Rossillon que tuich li cavallier e las dompnas lor vengesson far anoal chascun an. E Raimons de Castel Rossillon moric en la preison del rei. |