I.
Selh, cui joys tanh ni chantar sap
e sos belhs ditz vos despendre,
a tal dona·ls fass’ entendre
qu’onratz li sia·l dons e·l pros;
qu’assatz deu valer cortes nos
dezavinen drudairia,
e s’ieu domnei a fadia,
sivals ades enquier en luec gentil.
II.
Leial domna, franch’ ez umil,
vuelh mais servir et atendre,
que d’autra guizardon prendre,
cui soven agues ops perdos.
Aital, ses bruig e ses tensos,
guaya, de belha paria,
corteza, ses vilania,
l’ai chauzida, ses fencha e ses gap.
III.
E si tot ab lieys non acap
lo joy que·m fa·l cor ensendre,
per so no n’es mos gauchz mendre,
pos de mi no mou l’ochaizos,
qu’ieu no·m n’azir ni·n sui clamos;
mas qui·ls dreitz d’Amor seguia,
ben sai que razos seria,
s’ieu la tenh car, qu’elha no·m tengues vil.
IV.
Plazer li deu, quar entre mil
donas vuelc a sa cort tendre,
e si·m laissa mais dessendre,
no·n parra sos captenhs tan bos;
que ja van dizen a rescos
qu’ieu non sec la dreita via;
mas per dig d’autra que sia
non puesc creire qu’en lieys m’amor mescap.
V.
S’ieu de midons aic ren d’arrap,
no·ilh vuelh tort ni dreg contendre,
c’adobatz li sui del rendre,
mas juntas e de genolhos,
pero, s’ilh plagues que fos dos,
molt feira gran cortezia,
e s’a lieys non platz, estia,
qu’eu·n sui batutz plus fort c’ab un vergil!
VI.
Menar me pot ab un prim fil
e·l sieu mezeis tort car vendre,
qu’ieu no·m vuelh a lieys defendre,
si tot m’en era poderos:
que tant sui sieus per qu’es razos
que s’elha en ren falhia,
que·il colpa deu esser mia,
et es ben dreg qe·m torne sus el cap.
VII.
Dona, Bezers ni Aragos
ad ops d’amar no·us valria
tan cum Miravals faria,
si franchamen tenetz guarnit lo cap.
VIII.
Si·m vol mal neguns dels baros
per Mon Audiart, lur sia!
Que tan val sa senhoria
ja per negu no·m partrai de son trap.
IX.
Quar es tan sos pretz cars e bos,
ab N’Alazais vuelh paria,
e serai sieus tota via
apres selha que no vol qu’om en gap.