| P Eire daluernge si fo deleuescat de clarmon. sauis hom fo eben letratz e fo fills dun borzes. bels (et) auinens fo de la p(er)sona. etrobet ben ecantet ben. E fo lo primiers bons trobaire que fo outramon. (et) aquel q(ue) fetz los meillors sons deuers q(ue) anc fosson faich. el uers q(ue) ditz. De iostals breus iorns els loncs sers. Cansson non fetz neguna. que non era adoncs negus chantars apellatz canssons mas uers. E fo mout honratz egrazitz p(er)totz los ualens homes e p(er) los ualens barons que adoncs eran. e p(er) totas las bonas dompnas. (et) era tengutz p(er)lo meillor trobador del mon en aqella sazon. entro q(ue) uenc Girautz debor neill. Mout se lauzaua en sos chantars e blasmaua los autres trobadors. si q(ue) el dis de si. peire daluernge a tal uotz q(ue) chanta desobre e desotz. ab qun pauc esclarzis sos motz. eil son sunt doutz eplazen. epoises maestre detotz. Longamen estet euisq(ue)t elmon ab la bona gen. segon qem dis lo dalfins daluernge encui terra el nasq(ue)t. Epuois el fetz penedenssa. elai fenic. |
Peire d’Alvernge si fo de l’evescat de Clarmon. Savis hom fo e ben letratz, e fo fills d’un borzes. Bels et avinens fo de la persona. E trobet ben e cantet ben, e fo lo primiers bons trobaire que fo outramon et aquel que fetz los meillors sons de vers que anc fosson faich, e·l vers que ditz: De iosta·ls breus iorns e·ls loncs sers. Cansson non fetz neguna, que non era adoncs negus chantars apellatz canssons, mas vers. E fo mout honratz e grazitz per totz los valens homes e per los valens barons que adoncs eran, e per totas las bonas dompnas; et era tengutz per lo meillor trobador del mon en aqella sazon, entro que venc Girautz de Borneill. Mout se lauzava en sos chantars e blasmava los autres trobadors, si que el dis de si: Peire d’Alvernge a tal votz que chanta de sobre e de sotz, ab q’un pauc esclarzis sos motz. E·il son sunt doutz e plazen; e pois es maestre de totz. Longamen estet e visquet el mon ab la bona gen, segon qe·m dis lo Dalfins d’Alvernge en cui terra el nasquet. E puois el fetz penedenssa, e lai fenic. |