| Rubrica | |
| Bertrand idem. | Bertrand idem. |
| I | |
| Eu m’escondisc domna, que mal no me<re>r de so que °us an de mi dit lausengier. Per merce, prec com non puosca mesclar lo vostre cors fin, leial, vertadier, humil e franc, cortes e plasentier ab mi, domna, per mensomias comdar. |
|
| II | |
| Al premier get perd’eu mon esparvier, que°l m’ausian el pnoing falcon lainier e porton l’en, q’ie°l lur veia plumar, s’eu non am mais de vos lo conssirier que de nuill’autrau non desirier, quem don s’amor ni°m reteingn al colgar. |
|
| III | |
| Autres condic vos farai plus sobrier, e non mi puosc oirar plus d’enconbrier: s’eu anc failli ves vos neis del pensar, quant serem sol en chambra o dinz vergier, failla°m poders de ves non conpaingnier de tal guisa que no°m puosc’aiudar. |
|
| IV | |
| S’ieu per iugar m’aset pres del taulier ja noi, puosca baratar un denier ni ab taula presa non puosca intrar, anz giet ades lo reir rairar derier, s’ieu autra domna deman mi enquier mas vos cui am e desir e tenc car. |
|
| V | |
| Seingner s’ieu ai en castel parsonier, et en la tor siam quat<e>re parier, e ia l’uns l’autre nons poscam amar anz n’aion obs top temps arbalestrier metge sirven e gaitas e portier s’ieu anc aic cor d’autra domna amar. |
|
| VI | |
| Ma domnam lais per autre cavalier, e puois non sai a que m’aia mestier e failla°m venz quant serai sobra mar; en cort de rei me batan li portier, et en cocha fasa°l fugir premier, si non menti cel qe°us anet comtar. |
|
| VII | |
| Domna, s’ieu ai mon austor anadier, bel e mudat ben prendent e manier que tot ausel puosca apoderar sign e grua et aiglo blanc e nier volrialo donc mal mudat galinier gras de batent qe non puosca volar. |
|
| VIII | |
| Fals, enveios, fe-mentit lausengier puois ab midonz m’avez mes destorbier ben lausera que°m laissesez estar. |