| Bernard. LAn qan uei la fuolla. Ios dels arbres cager. Cui qe pes ni duoilla. A mi deu bon saber. Non creaz qeu uoilla. Flor ni fuoilla uezer. Qar ues mi sorguoilla. Cho qeu plus uolgrauer. Cor ai qe men tuoila. Mas non ai ges poder. Qades cuich ma cuoilla. On plus me desesper. Estraigna nouella. Podez de mi audir. Qe qant uei la bella. Qem solia cuoillir. Ara no mapella. Nim fai uas sei uenir. Lo cor soz laseilla. Men uol de dol partir. Deus qil mon chapdella. |
|
| Sill plaz men lais iausir. Sen aissim reuella. Noi a mais del morir. Non ai mais fianza. En agur ni en sort. Qe bon esperanza. Ma (con)fundut (et) mort. De tan loing me lanza. La bella cui am fort. Qant li qer samanza. Com seu li agues gran tort. Tant nai de pesanza. Qe tot men desconort. Mas no(n) faz senblanza. Cades chant (et) deport. Al no sai qe dire. Mas molt faz gran folor. Qar am ni desire. Del mon la bellisor. Ben deuria aucire. Qi anc fez mirador. Qan ben mo consire. Non ai guerrer peior. Ial iorn qe las mire. Nis pes de sa ualor. No serai iauzire. De lei ni de samor. Ia per drudaria. No man qe nos coue. Pero sill placia. Qem fezes qalqe be. Eu li iuraria. |
|
| Per deu (et) per ma fe. Qel bes qem faria. No fos saubuz per me. En son plaisser sia. Qeu soi en sa merce. Sill plaz qe maucia. Qeu nomen clam de re. Ben es dreich qeu plaigna. Seu perd per mon orguill. La bona conpaigna. El solaz qauer suoill. Petit me gadaigna. Lo fols ardiz qeu cuoill. Qar uas mi sestraigna. Cho qeu plus am ni uoill. Orguoill deus uos fraigna. Qar en ploron mei oill. Dreich es qem soffraigna. Tot iois qeu eis lom tuoill. Escontral da(m)pnage. Et la pena qeu trai. Ai molt bon usage. Qades consir de lai. orgoill (et) folage. Et uilania fai. Qin mud mon corage. Ni daltram met en plai. Qar meillor message. En tot lo mon non ai. Et man loill ostage. Entro qeu torn dechai. Do(m)pnal mon corage. |
|
| Meillor amic qeu ai. Uos man en ostage. Entro qeu torn de chai. |