Tu sei qui

Edizione diplomatica

Schede primarie

Bernard. T
EStat ai com hom esperduz.
Per amor un long estage.
Mas eram soi reconeguz.
Qeu auia faich folage.
Qatoz era dessaluage.
Qar mera del chan recreduz.
Et eu on plus estera muz.
Mais fera de mon da(m)pnage.

A tal do(m)pna mera renduz.
Canc no mamet de corage.
Et soi men tard apercebuz.
Qe trop ai fat lonc badage.
Oimais segra son usage.
De cui qem uoilla serai druz.
Et trametrai per tot saluz.
Et aurai mais cor uolage.

Truanz uoill esser per samor.
Et conuen qab lei aprenda.
Per o no sai do(m)pneiador.
Qe menz de mi si entenda.
Mas bel mes qab lei contenda.
Qaltra nam plus bella (et) meillor.
Qem ual (et) maiuda em socor.
Em fai de samor esmenda.

Aqesta ma fait tan donor.
Qe li plaz li car mercen prenda.
Et prec la del seu amador.
Qel ben qem fara nom uenda.

Nim faza far lonc atenda.
Qe lonc terminim fai paor.
Qe no uei maluaz donador.
Qab lonc respeich nos defenda.

Mado(m)nam fo al comensar.
Francha (et) de bella conpaigna.
Per zo la deu eu mais amar.
Qe sim fos feira (et) straigna.
Qe dreich es qe do(m)pnas fraigna.
Uas celui qi a cor damar.
Qi trop fai son amic preiar.
Dreich es qamic li sofraigna.

Do(m)pna pensem delenganar.
Lausengiers cui deus contraigna.
Qe tant com hom lor pot enblar.
De ioi (et) tant sen gadaigna.
Sol qe iaus nos en plaigna.
Pot longs te(m)ps nostramors durar.
Sol qan luoser uoillam parlar.
Et qan luox non er remaigna.

Deu lau qera sai chantar.
Mal grat naia ma dolz esgar.
Et cil ab cui saconpaigna.

Fis iois ges nos puosc oblidar.
Anz uos am eos uoill eos teing car.
Qar mes de bella conpaigna.