| Bernard de uentadorn. NOn nes meraueilha seu chan. Meils de nul autre chantador. Qar plus metral cor uas amor. E mielz soi faz al seu coman. Qe cor e cors e saber e sen. E forza e poder iai mes. Sim tira uas amor lo fres. Qe uas autra part non i sa ten. BEn es mort qi damor non sen. Al cor qal qe dolça sabor. E qe ual uiure ses ualor. Mas per ennuog far a la gen. Ia domine dieus no(n) mair ta(n)t. Qeu ia pois uiua iorn ni mes Pos trop serai de noi re pres. E damor non aurai talan. A Bona fe e ses enian. Am la plus bella e la meillor. Del cor sospir e dels oils plor. Qai tan lam eu per qe iai dan. E qen pois als cal cor im pren. En la carcre en qe ma mes. |
|
| Non pot claus obrir mas merces. E dai qela noi trob nien. AQest amor mi fer tan gen. Al cor duna dolça sabor. Cent uez muer lo iorn de dolçor. E reuiu de ioi autre cen. Tant es mos mals de bel semblan. Qe mais ual mon mals qautre bes. E pois lo mals ai tant bon mes. Bons mer lo bens a pres lafan. BOna donna ren nous de man. Mais qem prendaz per seruidor. Qeus seruirai cum bon seingnor. Ço qe pois del gaçerdon an. Ueus me als uostre comandamen. Bels cors gentils francs e cortes. Ors ni leos non es uos gen. Qe mauciez sa uos mi ren. Qant eu les gart ben mes paruen. Als oils als uis a la color. Qau tre si trembli de paor. Com fai la foillia contral uen. Non ai de sen per un enfan. Aisi soi damor entre pres. Et homes qes aisi co(n)ques. Pod donna auer al moina gran. AI deus qar non foron trian. Dentrels fals li finamador. Qe lausenier e triccador. Portassen corn el fron denan. Tot laur del mond e tot largen. |
|
| I uolgr auer dat sieu lagues. Sol qe madonna i conogues. Aisi cum eu lam finamen. |