| Bernartz deuentedorn. | Bernartz de Ventedorn. |
| I | I |
| QAn la freidura uenta. De ues n(ost)re pays. Ueiaire mes qieu senta. Un uent deparadis. P(er) amor delagenta. Uas cui ieu sui aclis. Encui ai mes mententa. Emon coratge assis. Car de totas partis. P(er) lieis tant matalenta. |
Qan la freidura venta deves nostre pays, veiaire m’es q’ieu senta un vent de paradis per amor de la genta vas cui ieu sui aclis, en cui ai mes m’ententa e mon coratge assis, car de totas partis per lieis, tant m’atalenta! |
| II | II |
| Sol lo ben qem presenta. Sos bels cors el francs uis. Q(ue) ia plus nom cossenta. Mi deu auer conquis. Nosai p(er) qeus enme(n)- ta. Car deren non sui fis. Mas greu mes qem repenta. Q(ue) una uetz me dis. Q(ue) pros hom safortis. El maluatz sespauenta. |
Sol lo ben qe·m presenta sos bels cors e·l francs vis, que ia plus no·m cossenta, mi deu aver conquis. No sai per qe·us en menta, car de ren no·n sui fis; mas greu mes qe·m repenta, que una vetz me dis que pros hom s’afortis e·l malvatz s’espaventa. |
| III | III |
| De do(m)pnas mes ueiaire. Q(ue) gran faillime(n) fan. P(er)so car nois fant gaire. Amar afin aman. Eu non dei ies retraire. Mas so qellas uolran. Mas greu mes cus trichai- re. A damor ab engan. O plus o atretan. Cum cel qes fis amaire. |
De dompnas m’es veiaire que gran faillimen fan per so car no·is fant gaire amar a fin aman. Eu non dei ies retraire mas so q’ellas volran, mas greu m’es c’us trichaire a d’amor ab engan o plus o atretan cum cel q’es fis amaire. |
| IV | IV |
| Do(m)pna que cuiatz faire. De me q(ue) uos am tan. Caissim uezetz maltraire. Emorir detalan. Ai francha de bon aire. Faitz me un bel semblan. Tal don mos cors sesclai re. Q(ue) mout trac gran afan. Enoi dei a- uer dan. Car nomen puosc estraire. |
Dompna, que cuiatz faire de me que vos am tan, c’aiss·im vezetz mal traire e morir de talan? Ai! Francha de bon aire, faitz me un bel semblan, tal don mos cors s’esclaire! Que mout trac gran afan, e no·i dei aver dan, car no m’en puosc estraire. |
| V | V |
| Si non fos gens uilana. Elausengier sa- uai. Eu nagra amor certana. Mas so me(n) reiretrai. Desolatz mes humana. q(ua)n luocs es ni seschai. P(er) qieu sai casotzmana. nau- rai enqera mai. Castrucs soiorna eiai. Emalastrucs safana. |
Si non fos gens vilana e lausengier savai, eu n’agra amor certana; mas so m’en reiretrai. De solatz m’es humana quan luocs es ni s’eschai, per q’ieu sai c’a sotzmana n’aurai enqera mai, c’astrucs soiorna e iai e malastrucs s’afana. |
| VI | VI |
| Cel sui q(ue) non soana. Lo ben q(ue) dieus li fai. Qen aqella setmana. Qand ieu partic delai. Mi dis en razon plana. Q(ue) mos can- tars li plai. Tot arma crestiana. Uolgra agues tal iai. Cum ieu agui (et) ai. Car sol daitan sen uana. |
Cel sui que non soana lo ben que Dieus li fai, q’en aqella setmana qand ieu partic de lai, mi dis en razon plana que mos cantars li plai. Tot’arma crestiana volgra, agues tal iai cum ieu agui et ai, car sol d’aitan se·n vana. |
| VII | VII |
| Si daisso mes certana. Dautra uetz lan creirai. Osi que non ia mai. Non creirai crestiana. |
Si d’aisso m’es certana d’autra vetz la·n creirai; o si que non, ia mai non creirai crestiana. |