| I | |
| Bele dame me prie de chanter, si est bien drois que je face chançon, je ne m'en sai ne ne puis destorner car n'ai pöoir de moi se par li non, ele a mon cuer que ja n'en qier oster et sai de voir qu'il n'i trait se mal non, or le dont Dex a droit port arriver car il c'est mis en mer sanz aviron. |
|
| II | |
| Preus et sage, je ne vos os conter la grant dolor que j'ai s'en chantant non, et sachiés bien plus n'en orrois parler car je n'i voi nule droite raison, j'aim melz ensi soufrir et endurer ces tres douz maus sanz avoir garison que d'un autre quant qu'en peut demander, ce sachiés bien, debonaire au douz non. |
|
| III | |
| De ceste amor qui tant me fait pener, ne voi je pas con je puisse partir car je ni voi raison de l'eschiver ne n'est pas drois que g'en doie jöir; mes fol desir fait souvent cuer penser en si haut lieu qu'il n'i peut avenir et fine amor si ne doit pas grever ceus qui painent toz jor de li servir. |
|
| IV | |
| S'onques amis ot joïe por amer, je sai de voir que n'i doi pas faillir car riens fors moi ne porroit endurer les grans travaus que j'ai por li servir, a son plaisir me fait plaindre et plorer et souspirer et veillier sans dormir, més itant fu a moi reconforter que nuit et jor en plorant la remir. |
|
| V | |
| Je ne me sai tenir ne conforter de vos biax cuers entierement et quant je plus vos doi crïer lors vos truis je crüel si durement que ja a moi ne ferés biau semblant, ainz les faites autrui por moi grever, més quant vostre oeil me vuellent regarder et je remir le vostre biau cors gent, tant sui je hors de paine et de torment. |