[c. 40 r. A]
 |
au douz non. De ceste amour qui tant me fet pener; ne uoi ie pas com ie puísse partír. car ie ni uoi reson de leschiuer; ne nest pas droiz que gen doie ioir. mes fol desir fet souuent cuer penser. en si haut lieu qil ní puet auenir. et fíne amour si ne doit pas greuer; ceus qui paínent touz iorz de li seruir. Sonques amis ot ioie pour amer; ie sai de uoir que ni doi pas faillír. car riens fors moi ne porroit endurer; les granz trauaus que iai pour li seruir. a son plesir me fet plaindre et plorer. et souspirer et ueillier sanz dormír. mes itant fu a moi reconforter; que nuít et iour enplorant la remír. Ie ne me sai tenir ne confor - ter; de uous biax cuers seruir entierement. et quant ie plus uous doi merci crier; lors uos truis ie cruels si durement q(ue) ia a moi ne ferez biau senblant. aínz les fetes autrui por moi greuer. mes quant uostre oeil me uuelent regarder. et ie re mir le uostre biau cors gent. tant sui ie hors de paíne et de torment. |