I.
Qant la douch’aura s’amarcis,
e·l fuoilla chai de sul verzan,
e l’aucel chanjan lor latis,
ez ieu de sai sospir e chan
d’amor qi·m ten lachat e pres,
q'ieu anch no l’hagui en poder.
II.
Las! q’ieu d’amor non hai conquis
mas can lo trebaill e l’affan;
ni res tan greu no·s convertis
com fai cho q’ieu vauc deziran;
ni tal enveia no·m fai res
cum fai cho q’ieu non puosc haver.
III.
Per una joia m’esbaudis,
fina, q’anch ren no amei tan;
qant son ab lei si m’esbaïs
q’eu no·ill sai dire mon talan,
e qant m’en vauc vejaire m’es
qe tot perda·l sen e·l saber.
IV.
Tota la gencer q'anc hom viz,
encontra lei no prez un gan;
qan tot lo siegles brunezis,
delai on il es si resplan;
Dieu prejarai q'anquar la·m des,
o qe la vei’anar jaser.
V.
Totz tressaill e bram e fremis
per s’amor, dormen e veillan;
tal paor hai q’ieu mesfaillis,
no m’aus pessar cum la deman;
mais servir l’ai dos ansz o tres,
e puois be leu sabra·n lo ver.
VI.
No muer ne viu e no guaris,
e mal non sen e si l’hai gran,
qar de s’amor no soi devis;
no sai si ja l’haurai ni qan;
q’en leis es tota la merces
qe·m pod sorzer o dechaszer.
VII.
Bel m’es qant ilh m’afolletis,
e·m fai badar, e·n vau muszan;
de leis m’es bel si m’escharnis,
o·m gaba derers o denan;
q’apres lo mal me venrra·l bes
be leu, s’a leis ve a plaszer.
VIII.
S’ella no·m vol, volgra moris
lo dia qe·m pres en coman;
hai lass! tan soavet m’aucis
qan de s’amor me fesz scemblan;
qe tornat m’ha en tal deves,
qe nuill autra non voill veszer.
IX.
Totz cossiros soi e jaucis,
qar s’ieu la doptei o la blan,
per lei serai o fals o fis,
o dreichurers o ples d’enjan,
o totz villa o totz cortes,
o trabaillos o de leszer.
X.
Mais cui qe plaja o cui qe pes,
ela·m pod, si·s vol, retener.
XI.
Cercalmont ditz: greu er cortes
hom qe d’amor se desesper.