I.
De touz maus n'est nus plesanz
fors seulement cil d'amer,
mès cil est douz et poignanz
et deliteus a penser
et tant set biau conforter,
et de granz biens i a tanz
que nus ne s'en doit oster.
II.
Fins amis obedianz,
vueil a ma dame encliner.
Je ne puis estre dolanz,
quant je oi de li parler;
tant me plest a remenbrer,
que de touz maus m'est garanz
sa biauté a recorder.
III.
Amors, quant vous m'avez mis
lïé en vostre prison,
melz ameroie estre ocis
que g'eüsse raençon.
Tels maus est bien sanz reson
qui me plest, quant me fet pis,
ne ja n'en qier garison.
IV.
Quanque il vous est avis,
dame, me senble reson;
si m'a vostre amor sorpris
et vostre plesant façon,
et biautez a tel foison
qui resplent en vostre vis
et dès les piez jusqu'en son.
V.
Se de vos peüsse avoir,
dame, un pou plus biau senblant,
je ne savroie voloir
querre Dieu merci si grant,
que de joie avroie tant
que tuit autre honme, pour voir,
seroient vers moi dolent.
VI.
Dame, ou touz mes biens atent,
sachiez, quant vous puis veoir,
nus n'a si joieus torment.