I.
Je me cuidoie partir
d'Amors, mès riens ne me vaut.
li douz maus du souvenir,
qui nuit et jor ne m'i faut,
le jor m'i fet maint assaut,
et la nuit ne puis dormir,
ainz plain et pleur et souspir.
Deus! tant art quant la remir,
mès bien sai q'il ne l'en chaut.
II.
Nus ne doit Amors traïr
fors que garçon et ribaut;
et, se n'est par son plesir,
je n'i voi ne bas ne haut;
ainz vueil qu'ele me truist baut
sanz guiler et sanz mentir;
mès se je puis consivir
le cerf, qui tant puet fouir,
nus n'est joianz a Thiebaut.
III.
Li cers est aventureus
et si est blans conme nois
et si a les crins andeus
plus sors que or espanois.
Li cers est en un defois
a l'entrer mult perilleus
et si est gardez de leus:
ce sont felon envïeus
qui trop grievent aus cortois.
IV.
Ainz chevaliers angoisseus
qui a perdu son hernois,
ne vielle qui art li feus
mesons, vignes, blez et pois,
ne chacierres qui prent sois,
ne leus qui est fameilleus
n'est avers moi dolereus,
que je ne soie de ceus
qui aiment deseur leur pois.
V.
Dame, une riens vous demant:
cuidiez vous que soit pechiez
d'ocirre son vrai amant?
Oïl, voir! bien le sachiez!
S'il vos plest, si m'ocïez,
que je le vueil et creant,
et se melz m'amez vivant,
je le vos di en oiant,
mult en seroie plus liez.
VI.
Dame, ou nule ne se prent,
mès que vos vueilliez itant
c'un pou i vaille pitiez!
VII.
Renaut, Phelippe, Lorent,
mult sont or li mot sanglent
dont couvient que vos rïez.