I.
Er ab la forsa dels freys,
quan totz le muns trembl’ e bruj,
val mais solaz e domneys,
e chans ab tot belh desduj,
qu’el temps quan fuelh’ e flors nays;
a seluy, qu’es pros e guays
contra l’us del temps e del mon,
bem par que bos cors l’en aon.
II.
En amors a manhtas leys,
e de manhtas partz aduj
tortz e guerras e plaideys:
leu reven e leu defuy,
leu s’apaya, leu s’irays,
e qui d’aisso l’es verays,
soven sospira de prion
e manhs enuegz blan e rescon.
III.
Anc mais ni tan no·m destreys,
mas er m’a trobat ab cuj
mi mou paors et esfreys,
e·m greug’ e·m pren e·m destrui;
et eu ges per tan no·m lays
que lai, don mi mou l’esglays,
non tenha mon cor deziron,
on plus lo dezirs me cofon.
IV.
La grans beutatz que pareys
en la belha cui homs sui,
e·l rics pretz q’a totz jorns creys,
m’a tout domneyar d’autrui;
mas us dous esgartz m’atrays
vas la belha, don jamais
non temsera fam, freg ni son,
s’agues cor del dig que·m respon.
V.
Pero, si tot s’es gabeys,
mos bos respieitz me conduy,
e si·m dizia sordeys,
no vuelh tornar lai don fuy.
Pus vengut es als assays,
poder a que·m derc’ o·m bays,
qu’ieu no·l fug, si·m ra o si·m ton,
ni ja no vuelh saber vas on.
VI.
S’a Lombers corteja·l reys,
tostemps mais er joys ab luy;
e, si tot s’es sobradreys,
per un pretz li·n venran duy:
que la cortezi’ e·l guays
de la belha N’Alazais,
e·l fresca colors ab pel blon
fan tot lo segle jauzion.
VII.
Dona, tan vos suy verays
que de totz cortes assays
vuel qe Miravalh vos aon,
mas non aus dir qals etz ni don.
VIII.
Per Mon Audiart suy guays,
que tota gens ad eslays
prezon mais lo comte Raimon
de nulh autre comte del mon.