I.
Si com fortune d'amors
me mainne diversement,
une fois chante, autre plor.
Mes ne m'avient pas sovent
qu'en baudor
prendre mes cuers tel sejor
que ma chansons en ament,
si en chant mainz plaisanment.
II.
Nonporquant j'ai ma paor
changié ja novelement,
dont ma dame, a cui j'aor,
tient mon novel hardiment
a folor
et di, se plus i demor,
que c'iert a mon nuisement;
mes a grant tort m'en reprent.
III.
Quar puis que toute dolor
ai soufert si doucement
por li et por sa valor,
esperer doi ensement
sa douçor;
ceste raison i ator,
se ma dame le consent
esperer doi hautement.
IV.
Mes a ma raison retor;
j'ai parlé trop folement,
car j'ai del mont la meillor.
Si doi conter por noient
au menor
de ses biens mon mal greignor;
et ne doi pas ingalment
avoir joie et torment.
V.
Quant je regart son ator
et son bel acesmement
et sa rosine color,
moi samble veraiement
que amor
doint sa biauté resplendor.
Je di ce que je en sent,
ne sai s'il est autrement.
VI.
Chanson, fai por moi clamor
la ou moi et toi present;
de ses puceles la flor,
de quant que ele entreprent,
que l'onor
li doint Deus au par destor.
A ces mos par droit entent
que por li chant seulement.